Forsa esi finì cun il ruaus a Masans

Che la clinica Waldhaus a Cuira engrondescha ses bajetg e survegn in parcadi sutterran è enconuschent. Il traffic tar quella garascha na vul la clinica dentant betg sin ses areal – quel duai vegnir manà tras in quartier abità. Per ils abitants da Masans inacceptabel.

Laschar ir video «Garascha sutterrana per la clinica psichiatrica Waldhaus a Cuira»

Garascha sutterrana per la clinica psichiatrica Waldhaus a Cuira

3:20 min, Telesguard dals 10.11.2017

La Via Cadonau en il quartier da Masans è ina via cun plitost pauc traffic. Quai pudess dentant bainbaud sa midar. Anc uss maina tut il traffic a la clinica Waldhaus a Cuira sur ina via sper il quartier ora si tar ils blers parcadis avant l'entrada. En futur duaian quels parcadis chattar plaz en ina nova garascha sutterrana en il nord da l'areal. La dumonda è be: co vegnan ins tar quella garascha? Tenor ils plans da la clinica tras il quartier abità.

Cunter quels plans sa dostan uss singuls abitants. In dad els è Hanspeter Hänni che abita sez en la via pertutgada. Tenor el esi uss il dretg mument da reagir, uss cura che la dumonda da construir n'è anc betg inoltrada. Perquai ha el envidà ad ina orientaziun per las medias.

Clinica Waldhaus vul dapli ruaus 

Da tschella vart la clinica Waldhaus che vesa quai in pau auter. La clinica vul pli pauc traffic avant l'atgna entrada per pussibilitar als cussadents dapli ruaus. Ina soluziun che cuntenta omaduas partidas n'è pia betg en vista.

Sco ultima soluziun e mo sche tut ils discurs na portan nagut, pondereschan singuls abitants en in proxim pass da purtar plant cunter il permis da bajegiar. Sche las duas partidas na vegnan vinavant betg perina vegnan la finala auters a decider per els.

TR Telesguard 17:40