Siglir tar il cuntegn

Header

audio
WEF: Demo en furma da spassegiada
Or da Actualitad dals 29.12.2022. Maletg: RTR
laschar ir. Durada: 1 minuta 53 Secundas.
cuntegn

Forum d'economia Demonstraziun en furma da spassegiada

Per la terza giada organisescha il «Strike WEF Kollektiv» ina spassegiada sco demonstraziun per il clima durant il Forum mundial d'economia a Tavau. La tura da dus dis maina da Küblis a Tavau, quai sco demonstraziun lubida. Quest onn vulan las autoritads dentant restrenscher la ruta.

Sin duas etappas stuessan ils viandants numnadamain midar sin il tren: per l'ina tranter Claustra e Tavau-Laret, là traversa la senda da viandar duas lavineras. Quai ha ditg Andre Kraske dal comité per il Forum d'economia da la Regenza grischuna al schurnal regiunal dad SRF.

Gia fatg ina giada quella ruta

Nagina chapientscha per quai ha Claudio Bernard ch'organisescha la tura. Ins haja gia ina giada passà precis quella ruta ch'ins ha inditgà tar la lubientscha. Tar l'ultima spassegiada da demonstraziun l'onn 2020 è quella etappa numnadamain vegnida lubida. Sin il Pass dal Wolfgang stuessan ils viandants ina segunda giada prender il tren per ils davos kilometers fin a Tavau, qua perquai che la vischnanca na lubescha naginas demonstraziuns per lung da la via. Il 2020 n'èn ils demonstrants betg sa tegnids vi da quellas cundiziuns ed han prendì la ruta a l'ur da la vischnanca. Leza giada ha la polizia tolerà quai.

Resguardar las premissas

Quest onn saja quai dentant auter, di Claudio Bernard. Las autoritads han gia annunzià ch'ellas vegnian ad intervegnir en uschè in cas. Las demonstrantas ed ils demonstrants vegnan quest onn a sa tegnair vi da las prescripziuns da las autoritads. Els vegnan dentant ad examinar era giuridicamain tge che saja pussaivel per proximas ediziuns da la spassegiada d'enviern a Tavau. A Tavau sez vegnan ils viandants e las viandantas a s'unir cun la Juso, ils socialists giuvens, che han annunzià ina demonstraziun cunter il Forum mundial d'economia.

RTR actualitad 08:00

Artitgels legids il pli savens

Scrollar a sanestra Scrollar a dretga