Siglir tar il cuntegn

Header

cuntegn

Fracziun PPS Dapli plaz e dapli temp

La PPS è creschida il pli fetg da tuttas partidas. Aifer dus dis è'la uss sa preparada sin la sessiun dal Cussegl grond.

Avant quatter onns eran els anc nov persunas – uss è la fracziun da la PPS creschida sin 25 chaus. Quai munta per l'ina dapli forza en il Cussegl grond, per l'autra dovra la fracziun er dapli plaz per sias sesidas da fracziun. E cun pli blera glieud giaja er tut in zic pli ditg, uschia Valérie Favre Accola che fa part da la direcziun da la fracziun. Durant dus dis è la fracziun s'inscuntrada quest'emna a Parpan ed ha chattà plaz en ina sala d'in hotel. Armads cun tablets, laptops, documents e cudeschets cun las fatschentas che vegnan tractadas è vegnida discutada la sessiun che stat sin rucca ed er la strategia dals proxims quatter onns. E quella è clera, la partida va en l'opposiziun. Quai saja giavischà dal suveran, uschia Roman Hug, il president da partida che leva en sasez far il sigl en la regenza.

audio
PPS GR: È la nova fracziun pronta per sessiun?
ord Actualitad dals 18.08.2022.
laschar ir. Durada: 2 minutas 52 Secundas.
Nus essan en l'opposiziun. La populaziun vul che nus mussain a la regenza, che consista ord ina maioritad da l'Allianza dal Center, nua ch'il chalzer smatga.
Autur: Roman Hug president PPS Grischun

Tenor Roman Hug vul la PPS dentant far politica constructiva e sa fatschentar cun problems che pertutgan la populaziun. Sco per exempel il problem cun ils lufs, nua che la regenza haja fatg memia pauc ils davos onns.

audio
PPS GR: Strategia en vista a sessiun
ord Actualitad dals 18.08.2022.
laschar ir. Durada: 2 minutas 41 Secundas.
La regenza pudess er guardar pli exact tge ch'è pussaivel cun la clausula generala da polizia ed ella pudess er guardar co la protecziun da la proprietad, ch'è protegida da la constituziun, è d'interpretar.
Autur: Roman Hug deputà

Co ils plans concrets guardan or per ils proxims quatter onns, na leva Roman Hug betg tradir. I saja dentant bun da pudair prender dapli influenza er via las cumissiuns en il Cussegl grond che preparan las fatschentas avant ch'ellas vegnan lura tractadas da l'entir parlament. Malgrà dapli chaus è la PPS dentant anc lunsch davent d'ina maioritad e sto perquai guardar da far allianzas cun autras partidas, là sajan ins avert, uschia il president da partida. Regenza e parlament vegnian en scadin cas a sentir la nova forza en furma d'opposiziun.

RTR actualitad 12:00

Artitgels legids il pli savens