La gruppa dals gieus en il liber (Freilichtspiele) Cuira sa mida mintg'onn in zic e consista d'acturas ed acturs professiunals sco era laics. Cun la planisaziun dal toc actual han ils organisaturs gia entschet avant dus onns. Tar la schelta d'acturas e d'acturs mettian els cunzunt paisa sin diversitad pertutgant la derivanza socioculturala e regiunala, declera il suprastant Roland Amrein. Uschia hajan els pass per pass chattà ils 23 acturs che han ina vegliadetgna tranter 20 e 75 onns. Cun las provas haja la gruppa lura entschet la fin dal matg, e per part gì 5 provas ad emna.
Per giugar en il liber stoppian ins per part esser in zic resistent a l'aura - ferntant ch'in tetg protega las visitadras ed ils visitaders dal teater encunter la plievgia, han las acturas ed ils acturs simplamain da tegnir la dira a las lunas da l'aura.
Quai tutga simplamain vitiers e là ston ins ir tras.
Tar in urizi u suflas da stemprà stoppia il teater dentant vegnir interrut u spustà ord motivs da segirtad.
«Sommernachtstraum» – gnanc per l'emprima giada en il Hof a Cuira
Avant 43 onns è la cumedia da Shakespeare per l'emprima giada vegnida giugada dal teater en il liber a Cuira. L'istorgia, ch'è vegnida scritta avant bun 400 onns, haja cunzunt purtà ina sfida per intgins acturs:
L'emprender ordadora il text. Igl è oramai Shakespeare ed uschia è tut scrit en vers.
En «Sommernachtstraum» vegnan colliadas 4 istorgias, e quellas portan in vair stgazi d'emoziuns: Intrigas, amur e schalusia, vitiers datti dialas, retgs e striegn.
La premiera ha lieu ils 24 da fanadur, planisadas èn 14 preschentaziuns fin ils 16 d'avust.