Insaquantas situaziuns pon esser privlusas. Norina Voneschen è la manadra da tgira en la chasa da tgira Neugut a Landquart. Ella di, che cunzunt glieud cun demenza possia avair tendenzas agressivas.
Ord emoziuns u reacziuns ch’ins na po betg chapir u sch’els èn malsegirs, dattan els tuttenina ina frida.
Bleras directivas e mussavias
Per che nagut da la violenza a chasa resta en il zuppà, sto la chasa da tgira communitgar ils cas da violenza a l’Uffizi chantunal da sanadad. En las chasas da tgira Neugut e Senesca a Landquart e Maiavilla haja l’onn passà dà 21 cas d’ina furma da violenza a chasa. 18 da las attatgas sajan stadas dals cussadents envers il persunal e trais tranter cussadents. Attatgas dal persunal cunter cussadents n'hai tenor Norina Voneschen betg dà. I dettia bleras directivas e mussavias co tractar tals cas.
Per exempel stoppia il persunal suenter in'attatga discurrer cun il cussadent e dumandar el davart ils motivs da sia agressiun. En ina scolaziun speziala emprenda il persunal mintg'onn da nov, co reagir en talas situaziuns. Cun tecnicas da deescalaziun emprenda il persunal dad ir enturn cun agressiuns che vegnan dals cussadents, però er da tegnair sut controlla las atgnas emoziuns e betg vegnir violent envers ils cussadents en situaziuns pretensiusas.
Abus sexual cunter dunnas giuvnas
En la chasa da vegls vivan savens ils attempads ed il persunal fitg datiers in da l’auter. E l’intimitad tranter persunal e cussadents po esser gronda, per exempel sch’ins sto gidar da sa lavar. Igl haja era gia dà tscherts cas, nua che cussadents masculins hajan mulestà sexualmain il persunal da tgira. Savens èn dunnas giuvnas stadas pertutgadas, dentant sajan ellas scoladas da reagir endretg en talas situaziuns.
Quellas situaziuns stoppian directamain vegnir annunziadas als superiurs. Silsuenter vegn sa barattà cun il cussadent davart ses motivs e lura decidì, tge mesiras ch’ins prenda. La dunna giuvna vegn silsuenter protegida. Norina Voneschen di che talas situaziuns possian far tema. E perquai guardian els suenter tals cas che la dunna pertutgada n'ha betg pli da tgirar quella persuna.
RTR novitads 07:00