Il Grischun ed il Tessin vulan metter sin pe in program da barat per la furmaziun professiunala. Quai ha ditg il cusseglier federal, Ignazio Cassis, ch’è stà preschent a l’inscunter d’ina delegaziun da la regenza grischuna cun la regenza tessinaisa a Bellinzona.
Il program da barat duai permetter ad emprendists e giuvens en il mund da lavur da far experientschas professiunalas en omadus chantuns. Uss duai ina gruppa da lavur evaluar, co realisar il program. Tar l’inscunter tranter la regenza grischuna e tessinaisa èsi era ì per la promoziun da la plurilinguitad e dal talian.