Siglir tar il cuntegn

Header

audio
En gir cun il currier da velo Flurin Appenzeller
Or da Actualitad dals 01.12.2023. Maletg: RTR
laschar ir. Durada: 5 minutas 1 Secunda.
cuntegn

Furnir sin duas rodas Il currier basilais che chanta e tschivla

Flurin Appenzeller pedalescha cun ses velo electric tras Cuira, el ramassa e scumparta per exempel cudeschs, medicaments, fluras e conservas da sang. Il student da Basilea dovra quest adrenalin dad esser en gir a mez il traffic.

Durant ses servetsch da circa tschintg uras porta el ina giacca plimetta, ina chapellina verda e guants – a Cuira poi vegnir fraid ed era buffar. Dentant ama Flurin Appenzeller d'esser circumdà da muntognas – quai era in motiv ch’el ha cumenzà ses studi a Cuira. Oriundamain deriva el da Basilea e fa bler sport. Uschia n'è la lavur sco currier da velo era betg propi stentusa per el.

Mintgatant part jau 20 min memia tard dal biro, uschia ch'jau hai in zic ina sfida da far tut.
Autur: Flurin Appenzeller currier da velo
Velochurier, Chur
Legenda: In velo electric cun si duas boxas e duas tastgas, in char annex pli lung ch'in meter ed ina bulscha – Flurin Appenzeller ha blera plazza per cudeschs, medicaments u flurs. RTR

Sin las vias da Cuira en il traffic ha el in detg tempo cun ses velo. Enturn stortas u rundellas pari ch’el ha ina gronda fiduzia en ils auters participants da traffic. Flurin Appenzeller raquinta ch’el haja schon gì intginas situaziuns delicatas sin via, el saja crudà, restà fermà en il binari dal tren u ch’in auto saja vegnì propi datiers. I para dentant ch’el piglia quai tut patgific – durant ir cul velo chanta e tschivla el. Tranteren possia dar ch’el vegnia sut squitsch da temp cura ch’el survegnia bleras incumbensas per in servetsch. En sias boxas u en il char annex èn cudeschs, medicaments, fluras e conservas da sang. Per lung temp ha Flurin Appenzeller pensà ch’el haja in job fitg impurtant:

Jau hai pensà che jau port era organs ad ospitals. Ina giada m'è crudà giu ina boxa d’organs, alura m’han els raquintà che organs vegnian transportads cun la Rega e che jau transporteschia boxas vidas – lura sun jau stà surlevgià.
Autur: Flurin Appenzeller currier da velo

Ad el plascha la lavur sco currier da velo propi, era sche l’aura n'è betg adina agreabla dad ir cul velo. El sa mova gugent e la glieud è per gronda part adina engraziaivla, cunquai ch'il currier da velo è pli spert che la posta.

RTR actualitad 07:00

Artitgels legids il pli savens