En il chantun Grischun datti 11 ospitals. Il cusseglier guvernativ Christian Rathgeb è en general cuntent cun la situaziun en ils ospitals. Quità fa dentant la mancanza da persunal.
Mantegnair servetschs da sanadad è impurtant
En il chantun Turitg cuntanschan ins en mes'ura per ordinari davent da mintga lieu tranter 4 e 22 ospitals. En il chantun Grischun cuntanschan ins durant il medem temp davent da tscherts lieus gnanc in ospital.
Uschia na possian ins decider pauschal per l'entira Svizra da fusiunar ospitals regiunals. Blers ospitals vegnian ins en il futur dentant betg pli a chattar sin la charta da la Svizra.
Per il chantun Grischuna na saja però betg pussaivel da fusiunar ospitals regiunals, senza tolerar ina mancanza dal provediment da basa en tschertas regiuns. E quai stoppian ins per tut pretsch empruvar dad evitar, uschia Christian Rathgeb, mumentan anc manader dal departament da giustia, segirezza e sanadad.
Collavuraziun e medis da savida generala
Per pudair mantegnair ils ospitals en las regiuns, saja fitg impurtant ch'i vegnia lavurà bain ensemen cun auters servetschs da sanadad sco la Spitex u chasas d'attempads.
Dasperas dovri er medis da savida generala e betg mo spezialists. Quels possian reagir il meglier en las regiuns perifericas sin ils differents cas – surtut sch'els èn là ils sulets medis.
RR actualitad 08:00