Siglir tar il cuntegn

Header

video
Nagin è la culpa – l'incendi en la garascha da l'AutoDaPosta
Or da Telesguard dals 27.09.2019.
laschar ir. Durada: 2 minutas 13 Secundas.
cuntegn

Garascha AutoDaPosta In defect tecnic haja chaschunà l'incendi

La garascha d'autos da posta a Cuira ha brischà il schaner passà pervi d'in defect tecnic en in dals autos da posta, communitgescha la procura publica grischuna. Cunquai che quest defect na saja betg stà da vesair externamain ed er betg en il rom da las lavurs regularas da mantegniment haja la procura publica sistì la procedura penala.

Er la reacziun da chadaina chaschunada entras il defect na saja betg stada da prevesair, uschia ch'ins na possia betg far responabel ni in manischunz, ni la firma da mantegniment ni il constructur da l'auto da posta pertutgà.

Il fieu ha chaschunà in donn total da quasi 11 milliuns francs. Radund 6,8 milliuns francs è stà il donn vi da vehichels e mobigliar e passa 4 milliuns francs il donn immobigliar.

Ils fastizs dal brischament èn anc visibels

Sco Urs Bloch, pledader dad AutoDaPosta ha ditg envers RTR, po l'interpresa puspè duvrar l'areal da la garascha per tancar e lavar ils autos da posta. Parcads vegnan ils autos da posta dentant dapi in'emna a l'Obere Au en il liber. En vista a l'enviern examinescha l'interpresa da construir là in tetg per proteger ils vehichels ed er il persunal. Cura che AutoDaPosta po puspè duvrar l'anteriur lieu da garascha er per parcar ils autos da posta è anc intschert.

Grazia ad autos da posta che l'interpresa ha pudì prender a fit dad autras regiuns, hai dapi il schaner mai dà interrupziuns en l'urar. Dals 17 autos novs empustads èn fin uss 7 gia arrivads ed en funcziun. Ils ulteriurs 10 avessan anc da vegnir en il decurs da l'atun.

audio
Bunura: AutoDaPosta Cuira – il stan actual suenter incendi
ord Actualitad dals 28.09.2019.
laschar ir. Durada: 2 minutas 2 Secundas.

RR novitads 11:00

Artitgels legids il pli savens