Ils diplomands e las diplomandas da l'hotellaria e gastronomia èn sa decidids ord differents motivs per ina professiun en questa branscha.
Cun questa professiun poss jau lavurar sin tut il mund.
Tenor ils diplomands e las diplomandas èn las differentas professiuns en l'hotellaria e la gastronomia, sco per exempel cuschinunz, spezialista da communicaziun d'hotel, spezialist da service u economista da chasa, fitg variantas. En cuschina as possia esser creativ e realisar atgnas ideas, declera in dals diplomands.
Jau sun ma decidida spontan per questa professiun – pir duas emnas avant l'entschatta da l'emprendissadi. Jau ma sun inamurada immediat en la professiun.
A blers che han fatg l'emprendissadi plascha il contact cun la glieud fitg bain. E la branscha d'hotellaria e gastronomia porschia ina massa pussaivladads da sa sviluppar enavant en las pli differentas direcziuns.
Jau hai l'hotellaria en mes gens – lavurar en in hotel è il parvis per mai.
Diplomaziun hotellaria e gastronomia Grischun
-
Bild 1 von 6. Bildquelle: RTR.
-
Bild 2 von 6. Bildquelle: RTR.
-
Bild 3 von 6. Bildquelle: RTR.
-
Bild 4 von 6. Bildquelle: RTR.
-
Bild 5 von 6. Ritual spezial per ils cuschinunzs e las cuschinunzas. Bildquelle: RTR.
-
Bild 6 von 6. Diplomands e diplomandas cun las meglras notas. Bildquelle: RTR.
Gastro Grischun: Promoziun da giuventetgna cun success
Gastro Grischun ha avant intgins onns lantschà differents projects per far pli attractiva la branscha d'hotellaria e gastronomia en il Grischunb – pia far reclama per la branscha, che quella daventia pli attractiva per giuvenils. Ils differents projects da Gastro Grischun han la finamira da motivar dapli persunas giuvnas da far in emprendissadi en la branscha. Per exempel datti projects nua che giuvenils survegnan in'invista en la branscha. Era per emprendists ed emprendistas datti mintg'onn in forum organisà da Gastro Grischun.
La promoziun na sa focussescha dentant betg mo sin giuvenils, di il president da Gastro Grischun, Franz Sepp Caluori. I dat era projects per patruns e patrunas, per ch'ils emprendists termineschian era lur emprendissadi e restian sin lur professiun. Per declerar l'effect dals varsaquants projects per far pli attractiva la branscha da gastronomia e hotellaria sa serva Franz Sepp Caluori d'in maletg: Avant intgins onns as haja cumenzà a semnar, fin ch'ins possia racoltar ils fritgs dovria dentant in zic temp. Mesirar il success as possia pir suenter intgins onns – il success da la promoziun saja uss visibel.
Ils ultims dus onns avain nus gì circa 20% dapli emprendists ed emprendistas en la branscha. Nus avain cuntanschì nossa finamira.
Quest onn survegnan 83 emprendists ed emprendistas dal sectur da gastronomia e hotellaria dal Grischun lur diplom. Quai saja en la media dals davos onns, di Franz Sepp Caluori. En dus onns vegnian quai ad esser circa 120 fin 130 d'els, grazia a la promoziun da giuventetgna da Gastro Grischun.
Per blers strusch d'imaginar: la via da la Posta a Cuira SENZA il café Caluori. Ils ultims 41 onns ha Franz Sepp Caluori manà il café. Cun ses 66 onns saja el plaunet en la vegliadetgna da chalar – i na saja betg uschia ch'el na possia betg pli, ma mintgatant as stoppia chalar cun insatge per pudair far insatge auter. Sco ch'i va enavant cun las localitads che tutgan a la Banca Chantunala Grischuna na saja anc betg cler. E tge fa Franz Sepp Caluori, u Seppo, sco tuts numnan el, senza il café Caluori? El haja anc da far ina massa auter – ed i saja era bel da magari far vacanzas e simplamain giudair la vita cun sia dunna.