L'enviern passà avevan blers manaschis ed uniuns spustà lur tschaina da Nadal sin la primavaira. Suenter avair stuì serrar per mais lur locals, è quai era stà in 'ulteriura cuntrafrida per la gastronomia. Entant pon ins dir, che la normalitad è turnada en il mintgadi – quai sentan era las ustarias sch'i va per las reservaziuns per tschainas da Nadal. Tenor il president da Gastro Grischun Franz Sepp Caluori sajan 80% dals plaz per tschainas da Nadal en il conturn da Cuira gia sis emnas avant Nadal occupads. La glieud haja grond gust da puspè star da cumpagnia.
Ins senta, che la glieud ha il desideri da prender suenter quai ch'è ils ultims dus onns betg stà pussaivel uschè simpel.
Quai vegnia uss da bun a la gastronomia – e lezza saja in mintga cas pronta. Ch'ils gastronoms vegnian ussa da gudagnar in vair sfratg cun il «run» sin las tschainas da Nadal snegaFranz Sepp Caluori. Ins saja dentant puspè circa sin il medem livel sco avant la pandemia. Tar las reservaziuns sa mussia ch’i vegnia quest onn tendenzialmain dà ora dapli raps per la tschaina da Nadal. I vegnia martgadà pli pauc – quant ch'i custi survegnia per gronda part ina rolla secundara. La glieud paria simplamain d'avair il desideri da star da cumpagnia ed haja plaschair che quai saja finalmain puspè pussaivel, di Franz Sepp Caluori.