Ina maioritad clera da 63,5% vul sustegnair la biblioteca da la citad cun dapli daners. Uschia vegn augmentada la contribuziun annuala per la biblioteca per circa 160'000 francs – sin var 1,25 milliuns. La raschun per auzar la contribuziun è tenor la citad cunzunt la chareschià ch'haja laschà crescher ils custs annuals.
Actualmain survegn la biblioteca da la citad da Cuira ina contribuziun annuala da la citad da 1’089’000 francs.
Auzament da la contribuziun a la biblioteca da la citad
Cuira: Auzament da la contribuziun a la biblioteca da la citad
-
GEA
9'068 Vuschs
-
NA
5'211 Vuschs
Situaziun finanziala difficila
Il 2016 ha la citad decidì da pajar ina contribuziun annuala da stgars 1,1 milliuns francs – quai è vegnì decidì sco import maximal. E quai mainia uss ad ina situaziun finanziala difficila perquai che la contribuziun na vegn betg adattada a la chareschia.
Quella è tenor il messadi da votaziun da la citad creschida dal 2016 fin 2025 per 8,8%. Ulteriurs punct èn ils custs da tschains ch’èn creschids dapi il 2018 per 4,5% sin 447’700 francs ed era ils custs d’informatica che importan radund 78’000 francs. Tenor Nicole Kaiser ch’è commembra dal cussegl da fundaziun na haja la biblioteca naginas reservas.
Per il mument èn ils tschains da locaziun fitg auts ed era ils custs per IT – nus na avain naginas reservas. E la qualitad da la biblioteca sto restar uschia sco ch’ella è per il mument.
Tenor ella na vegn betg discutà sche la biblioteca ha da serrar las portas u betg – mabain sche la purschida sto vegnir reducida u betg. Nicole Kaiser è da l’opiniun che la biblioteca dovra quest augment da 160’000 francs per che la qualitad resta.
La Partida populara svizra è da l’opiniun che reducir l’offerta fiss la soluziun. Tenor Erika Loretz, la presidenta da la PPS Cuira na dovria betg il fanestrigl da la posta u ils divers events. La biblioteca da la citad sa duess focusar sin lur incumbensa da basa - pia biblioteca e ludoteca. Per vegnir tar avunda entradas pudess la biblioteca tenor la PPS dar a fit las localitads a terzs.
Sajan quai firmas u uniuns che organiseschan divers evenimaints en las localitads da la biblioteca e pajan ina contribuziun.
In’autra pussaivladad, d’augmentar ils pretschs d’abunaments na saja tenor Nicole Kaiser nagin’opziun. Schon uss sajan ils pretschs plitost auts. I pudess era esser in privel ch'intgins clients e clientas sa decidan da betg pli pajar in abunament pli char. E da meglierar la situaziun finanziala cun spargnar custs da persunal na saja betg realistic. Las persunas che lavuran en la biblioteca sajan gia calculads stgars e las pajas sajan bassas en cumparegliaziun svizra.