Siglir tar il cuntegn

Header

cuntegn

Grischun Gea a nova mensa e mediateca

Passa 60% dals votants grischuns din gea a l’edifizi cumplementar da la mensa e da la mediateca da la scola chantunala a Cuira.

La nova mensa e mediateca da la scola chantunala a Cuira po vegnir bajegiada. 61,6% dals Grischunas e Grischuns ch’èn stads a votà, han ditg gea al nov bajetg da la scola chantunala. Cun 28’754 vuschs cunter 17’934 è il votum per il credit da 27 milliuns francs per il nov edifizi cumplementar stà cler.

En il nov bajetg – l’etappa finala da la sanaziun da la scola chantunala – duai dar sper ina nova mensa ed ina mediateca er locals per la protecziun dals bains culturals. La participaziun a la votaziun è stada plitost pitschna cun ina quota da 35%. Cun quest bajetg duai vegnir cumplettà las infrastructuras che mancan anc a la scola chantunala a Cuira. Pass per pass èn questas vegnidas sanadas ed adattadas dapi l’onn 2006 al manaschi.

Satisfatg e cuntent

La deputada Sandra Locher ch'ha fatg part al comité Pro mensa è satisfatga. Ella valiteschia quest resultat sco segn, ch’il suveran grischun vesia il project dal nov bajetg per la mensa e mediateca sco part da l’entir project da la sanaziun da la scola chantunala.

Cusseglier guvernativ Mario Cavigelli
Legenda: Keystone
In fitg bun resultat, pertge ins na sa mai ordavant con grondas che las resalvas da las autras regiuns èn.
Autur: Mario Cavigielli Cusseglier guverntaiv

Ed era il cusseglier guvernativ e schef dal departament da bajegiar Mario Cavigelli è cuntent dal resultat, cunquai ch’i n’è betg cler avant las votaziuns con grondas che las resalvas èn da las regiuns ch’èn betg pertutgadas dal project.

Küblis suonda a Brand

Sper ils deputads en il Cussegl grond, han era prest tut las partidas politicas dal Grischun recumandà d’approvar il project dal nov edifizi cumplementar da scola chantunala a Cuira. Encunter eran be la Partida populara dal Grischun e Heinz Brand ch’è a la testa da la PPS dal Grischun.

Il pli ferm suandà a l’opiniun da Heinz Brand e da la PPS èn ils votants da sia regiun. pli ferm na cun passa 65% ha cunquai dà a Cuvlignas/Küblis. Ed er las vischnancas vischinantas Conters e Saas han passa 60% dals votants refusà il credit per il nov edifizi

Per Brand in cler signal

La Partida populara svizra valitescha lura era ils 38% ch'han mess in na en l'urna sco signal ch'il pievel sappia ch'il chantun stoppia e duaja spargnar. Il president da la PPS dal Grischun, Heinz Brand discurra d’in cler avertiment dal pievel grischun envers la regenza grischuna ed il Cussegl grond.

Il president da la Partida populara dal Grischun, Heinz Brand.
Legenda: Keystone
In cler avertiment dal pievel envers la regenza grischuna ed il Cussegl grond.
Autur: Heinz Brand President PPS Grischun

«Igl è da sperar ch’era las autras partidas burgaisas pondereschan ussa da spargnar», uschia Heinz Brand envers RTR. «Las perspectivas finanzialas dil chantun Grischun èn schlettas. I na vertescha nagins projects da luxus pli.»

E cler ch'il gea a las 27 milliuns francs per mensa e mediateca saja ina trumpada. Mintga votaziun ch'ins sperdia saja ina trumpada.

Cadi e Küblis din na al project

En tut han la fin finala ils votants da 14 vischnancas refusà il project da l’edifizi cumplementar da la scola chantunala.

Tranter questas vischnancas sa chattan tranter auter la vischnanca da Cunter en il Surses (56%) ni era las vischnancas en la Surselva sco Tujetsch (56%), Mustér (58%), Sumvitg (56%) e Trun (52%). Era ditg na a la nova mensa a Cuira e mediateca han ils votants da las vischnancas da Lumnezia (54%) e Schluein (53%).

charta dal Grschun cun ils singuls destricts
Legenda: Ina survista co ils singuls districts han vuschà. RTR

Ch’ils votants da Mustér han refusà il project, pudess era avair da far cun il patratg da concurrenza: «La ponderaziun da concurrenza tranter las scolas medias dal Grischun po natiralmain avair giugà ina rolla tar la decisiun», di il reporter dad RTR, Rafael Müller.

«Da l'auter maun èsi era da dir, che dil gea tar l’investiziun a Cuira profiteschan era las autras scolas medias dal chantun, cunquai ch’il Cussegl grond ha collià la votaziun cun in augment da las pauschalas d’investiziun che las scolas medias survegnian per mintga scolar.»

Ponderaziun da concurrenza tranter scolas medias po natiralmain avair giugà ina rolla.
Autur: Rafael Müller Reporter RTR

Quest zutgerin paria d’avair gì effect. Mustér haja bain ditg na, dentant las autras vischnancas cun scolas medias hajan ditg gea: uschia Schiers cun 57% gea da las vuschs, Samedan (64% gea ), Scuol (68%) ed ils votants da Tavau han schizunt ditg gea al project cun 70% da las vuschs.

Per tge vai: Il project

Il project, ch’è planisà tenor il standard da Minergie® P-Eco, cumplettescha las infrastructuras da scola cun ils locals cuminaivels mancants. Pass per pass èn questas infrastructuras vegnidas sanadas ed adattadas dapi l’onn 2006 al manaschi. Sco lieu per mangiar, sa scuntrar ed emprender vegn il nov edifizi ad avair ina funcziun da center impurtanta entaifer la scola.

Custs da 27 milliuns francs

Cussegl grond

Avrir la box Serrar la box

Il Cussegl grond aveva approvà il project en la sessiun d'october 2014 e quai cun 108 cunter 0 vuschs e 2 abstenziuns.

Ils custs da construcziun importan totalmain 27 milliuns francs. 23,5 milliuns francs custan la mensa e la mediateca, 3,5 milliuns francs ils locals per la protecziun dals bains culturals. Ils meds finanzials ch’èn necessaris per l’etappa finala da la renovaziun da la scola chantunala grischuna na van betg a quint da las ulteriuras scolas medias en las regiuns.

La pauschala d’investiziun ch’il chantun paja annualmain a questas scolas vegn auzada proporziunalmain suenter l’avertura da la mensa e da la mediateca.

Artitgels legids il pli savens