Il chantun Grischun po festivar in term impurtant tar la mesiraziun uffiziala. Suenter 110 onns è l'entira surfatscha dal chantun mesirada e documentada. Vul dir: tant ils edifizis sco er las vias, ils guauds, ils lais ed ils glatschers èn documentads. Sco l'Uffizi d'agricultura e geoinfurmaziun communitgescha, è il Grischun pir il segund chantun da muntogna suenter l'Uri ch'ha dumagnà da far quai. E quai sco il pli grond chantun da la Svizra cun ina surfatscha da 7'105 km². Questas datas servan sco basa per l'entira economia publica.
- La mesiraziun uffiziala registrescha cunfins da bains immobigliars, per che quels possian vegnir inscrits en il register funsil e per che la proprietad possia vegnir garantida.
- Las datas servan sco basa per ils sistems d'infurmaziun geografics ed èn uschia in agid d'orientaziun tar differents projects e tar consultaziuns da persunas privatas, da l'economia, da la perscrutaziun e da l'administraziun.
- Las adressas dals edifizis furneschan la pli impurtanta basa per ils sistems da navigaziun. Da quai na profiteschan betg mo las persunas privatas ed ils servetschs da furniziun. Er ils servetschs da salvament survegnan qua tras in agid per chattar svelt in edifizi.
- Ils plans e las chartas da basa che vegnan deducids directamain da la mesiraziun uffiziala, servan a la planisaziun dal territori, per exempel per plans locals, plsnd da zonas u per planisaziuns da construcziun e da traffic.
Tras datas fidadas cun relaziun locala e tras ils sistems che sa basan sin quellas daventan las bleras decisiuns da l'economia e da la politica pli facilas, pli sveltas e pli segiras.
Dapi 110 onns vegni mesirà
Il fundament per ina mesiraziun sistematica è vegnì mess l'onn 1912, cura ch'il Cudesch civil svizzer è vegnì introducì. Il spiert da pionier d'ina mesiraziun da tut la surfatscha è però vegnì franà considerablamain tras l'Emprima e la Segunda Guerra mundiala. Ils geometers da quella giada eran anc lunsch davent d'ina mesiraziun da l'entira Svizra.
Per in schlantsch han procurà pli tard differentas adattaziuns da leschas sco er la digitalisaziun che vegniva utilisada en la mesiraziun uffiziala gia durant ils onns 1970. Novs instruments ed agids da calculaziun pussibiliteschan, ch'ils geometers pon lavurar en moda effizienta. Cumbain che l'entir Grischun è mesirà suenter 110 onns, ston las basas er en l'avegnir adina puspè vegnir renovadas e meglieradas cun novas tecnologias, sco per exempel cun models da 3D.
In diever da las datas:
