Quants autos e quants giasts che vegnan propi durant ils gieus olimpics en e tras il Grischun, saja difficil da dir. Quai manegia il manader da la gestiun dal Vereina Simon Rohner. I dat dentant prognosas ch'inditgeschan in augment dal traffic.
La subprognosa dal Vereina va ora da 30- 100 autos l'ura dapli.
Normalmain han ils trens dal Vereina ina capacitad maximala d'enturn 170 autos per ura. Durant quest temp intensiv quinta ils responsabels dentant cun 200 fin 300 autos per ura. Per far frunt a quest augment da traffic èn Simon Rohner e ses team sa preparads.
Sper la planisaziun normala per las emnas da favrer vegnan er ils gieus olimpics resguardads explicitamain. Durant l'emna charrescha in terz tren, uschè ch'il servetsch po vegnir mantgnì sco usità. Malgrà questas mesiras ston'ins dentant tuttina quintar cun temp da spetga. Quant lungs ch'els vegnan ad esser, saja dentant difficil da dir. Quai dependia da differents facturs.
Sch'i avess dad esser fitg mala aura, ed il traffic dal pass da la Güglia vegniss quatras era tar il Vereina, lura pudessi dar sfidas pli grondas.
Era l'attaga da cyber cunter la vendita da bigliets online è in tema che vegn resguardà. Dapi in'emna n'èsi betg pli pussaivel da cumprar in bigliet online. Ed il sistem resta probablamain era anc serrà fin a la fin da favrer. Quai na duess dentant betg chaschunar gronds problems, di Simon Rohner. En vistà als gieus olimpics lessan els avrir duas cassas.
Durant quest temp intensiv vegn augmentà il dumber da persunal - betg be a las cassas mabain era en general. Duas cassas avertas munta numnadamain che dapli autos pon passar tras il tunnel. Quai però be, sch'i dat era avunda persunas per manar ils autos sin ils trens.