Ils ultims 7 onns è Flurin Giger stà vidlonder da scriver il script per ses emprim film da kino «In onn senza stad». Il film tracta l'onn 1815 cun l'erupziun dal vulcan Tambora en l'Indonesia. In'erupziun cun consequenzas gravantas per l'entir planet, per l'Europa e cunzunt er la Svizra: Las particlas da la tschendra eran vegnidas en l'atmosfera ed han uschia procurà per in sfradentament da la temperatura e damain sulegl. La consequenza era gravanta, ina stad n'hai betg dà, racoltas han mancà.
En il center dal film stat ina famiglia da purs cun ina vita simpla ch'è era pertutgada da quest eveniment. Ma sco tuts da quest temp na saveva la glieud betg, pertge ch'i n'ha betg dà ina stad e pertge che la temperatura era sa sbassada.
Per quest film da kino tschertgan ils frars Giger uss actur:as laic:as rumantschas fin ils 01-07-2026. Quai en tuttas vegliadetgnas ed idioms. Per la rolla principala tschertgan els ina mattatscha tranter 13 e 17 onns.
T'annunzia qua
In film rumantsch senza savair rumantsch
Bain è il bab dals Gigers da Mustér, dentant n'hajan els betg emprendì rumantsch a chasa. In dischavantatg na vesan els betg en questa situaziun. Per realisar il film vegnan els a collavurar ensemen cun profis. Er il script vegn a vegnir translatà dal tudestg en rumantsch. En tge idiom ch'il film vegn a cumparair n'è anc betg decidì.
Nus essan creschids si cun il rumantsch, n'avain però betg emprendì la lingua. Noss bab ha set uffants, el aveva auters problems.
Filmà vegn durant l'entir onn 2027 e publitgà en ils kinos il 2028.
Gia gronds deals en il passà
Experientscha en il mund da film e reclama han els massa, els han gia pudì filmar spots da reclama per McDonald's, Coop, Appenzeller ni Nestlé sco era campagnas per l'Uffizi da sanadad BAG u il post da prevenziun d'accidents Bfu.
Ils frars Giger èn creschids si en il Partenz en ina famiglia cun set uffants, trais buobs e quatter mattas en in conturn fitg creativ, quai ch'ha promovì d'entrar en il mund d'art e film:
Nus essan creschids si fitg creativ. Noss bab ha in atelier da grafica ed jau hai fatg l'emprendissadi tar el.
Suenter l'emprendissadi ha quai dà lavurs fotograficas e pli e pli era filmicas per Silvan Giger. Tranter auter ha el filmà pliras giadas purtrets filmics al Festival da film a Turitg ZFF dals acturs da renum internaziunal sco Sharon Stone, Eddie Redmayne, Liam Neeson, Kristen Stewart u era Javier Bardem e Johnny Depp. Lez perfin duas giadas e tras quella collavuraziun hai quai manà ad ina ulteriura collavuraziun: in spot da reclama per Dior cun Johnny Depp per il parfum da Sauvage.
Era cun lur films curts Ruah (2016, 18 minutas) e Schächer (2018, 30 minutas) han els gì success: quels èn vegnids mussads a Cannes al festival da film sco era a la Biennale a Venezia.