L'Uniun grischuna d'artisanadi e mastergn festivescha quest onn il giubileum da 125 onns. A la radunanza da delegadas e delegads da quest onn èn vegnidas ensemen las pli impurtantas persunas da l'economia grischuna ed ina massa politichers e politicras. Er il cusseglier federal Albert Rösti è vegnì cun il helicopter da Berna a Cuira per tegnair in pled.
Suenter in pled dal president ha l'associaziun preschentà il program annual per l'auter onn e la strategia 2025 – 2028. Quels han las suandantas finamiras:
- Colliaziun ferma ed innovativa
- Reducir ils impediments birocratics e las regulaziuns ad in minimum
- Cundiziuns generalas favuraivlas per l'interpresa per in svilup economic dinamic e persistent
- Spezialistas e spezialists qualifitgads tras la furmaziun professiunala
- Il Grischun sco lieu attractiv da lavur e d'abitar
125avel giubileum vegn festivà
Nus represchentain dapi 125 onns interpresas grischunas ed avain oz var 6000 commembras e commembers. Quai fa grond plaschair e nus dastgain esser loschs.
A mai persunalmain fai losch ed umilitaivel. Per l'uniun hai num ch'ins na dastga er vinavant betg star airi.
Durant la radunanza da delegads a chaschun dal 125avel onn da gestiun è vegnì surdà per l'emprima giada il «Premi grischun d'interpresa». Il premi è dotà cun 3000 francs ed è ì a Giovanni Polti, il possessur da la Alfredo Polti SA en Val Calanca. L'interpresa numnada tenor il bab dal possessur explotescha mintg'onn var 18'000 m³ crappa cun agid da circa 35 collavuraturas e collavuraturs ed elavura vinavant lezza.
Il 125avel giubileum na nizzegia l'uniun d'artisanadi e mastergn dentant betg mo per festivar, i dat era entginas ulteriuras midadas:
Sper in nov logo è era vegnì adattà il num:
- Romontsch: «Uniun grischuna d'artisanadi e mastergn» daventa «Uniun grischuna da mastergn»
- Talian: «Unione grigionese delle arti e mestieri» daventa «Unione grigione arti e mestieri»
Cun cristal sin il logo stettia il BGV er en l'avegnir per tradiziun, forza ed innovaziun.
«Nus creain futur»
Cun quest motto fa l'Uniun d'artisanadi e mastergn danov reclama per sasezza. Tenor l'uniun èsi bel da guardar enavos sin l'onn da giubileum. I saja dentant er impurtant ch'ins guardia en l'avegnir.