Christian Will fa anc glatsch a Vaz Sut
Il lieu da producziun da Christian Will è in lieu nunspetgà: en il tschaler da la scola primara a Vaz Sut. Là sa chatta ina gronda cuschina cun differentas maschinas, paluttas, vaschs e padellas. Avant sis onns ha Christian Will cumenzà a far glatsch. Per l'um da 45 onns saja quai stà in pass logic da far glatsch. Dapi passa 10 onns producescha el numnadamain differentas chaussas. «Jau m'hai gia adina interessà per la producziun da victualias», di el. «Jau hai empruvà ora la pasta, paun, jogurt – e lura mancava anc il glatsch».
Uschia è naschida la firma «WillNatur» da Christian Will. El na producescha betg mo glatsch, mabain era jogurt, sirup, savuns e maina ina pratica da medischina natirala. Ses focus: la producziun natirala.
Ils emprims trais, quatter onns n'hai jau betg fatg vacanzas. Lura sun jau vegnì datiers dal burnout.
La dumonda per tals products creschia era, di Christian Will. Quai senta el vid sia atgna firma che ha adina dapli success. Ma fin ch'el saja arrivà tar quest punct, haja quai duvrà bler temp ed energia, di Christian Will.
-
Bild 1 von 3. Bildquelle: RTR.
-
Bild 2 von 3. Bildquelle: RTR.
-
Bild 3 von 3. Bildquelle: RTR.
El stima d'avair investì passa 200'000 francs en sia fatschenta. La concurrenza en il Grischun saja gronda. Quai senta el surtut en las butias.
I va per la plazza: Nua poss jau plazzar mes glatsch? Sche jau l'hai plazzà bain, lura cumpra quai er insatgi.
Ina buna plazza en ina butia, per exempel en il Manor u en il Volg, saja simplamain memia chara per el. In pitschen cup da ses glatsch custa 3 francs. Stizuns ed ustarias al vendan lura per 4 enfin 6 francs. Malgrà tut las difficultads al fa sia lavur plaschair. Ed er en l'avegnir vul el far vinavant glatsch.
Reto Lazzarini ha chalà
El ha gia adina gì avant egl in purtret concret da ses siemi: In agen café en l'Engadina, nua ch'el po vender ses glatsch. Avant set onns ha Reto Lazzarini fatg in emprim pass en questa direcziun ed ha cumprà ina maschina da glatsch. Cun sia partenaria Flurina Salis ha el lura cumenza a far glatsch.
El saja spert stà confruntà cun differentas sfidas, raquinta l'Engiadinais. Quellas tanschevan da l'invenziun d'atgnas recepturas fin a la lavur da chattar glieud interessada. E questa lavur era fitg dependenta da l'aura, raquinta el. Cura ch'i pluveva, na vuleva nagin cumprar dad els.
El vendeva ses glatsch ad ustarias u hotels en il Grischun, dentant er a l'ur da la via. Per el e sia partenaria saja quai adina stà in hobi – in hobi che n'ha betg purtà avunda daners per viver da la producziun da glatsch.
La stad gieva jau mintgamai in'ura cun il bus sin l'alp per prender latg frestg per mes glatsch. Sch'ins guarda quai uschia, na po quai betg render. Quai vesa mintgin ch'igl è mo in hobi.
Il pli savens han els lavurà la fin d'emna, da venderdi saira fin dumengia. Ed en media ha quai dà 7 kilograms glatsch per emna. Cun producir ils glatschs n'è però anc betg stà a fin. Emplenir cuppas, etichettar ellas, chattar persunas interessadas e far reclama èn mo in pèr da las sfidas ch'èn anc vegnidas vitiers.
Nus avain fatg gugent quai fin che nus avain ditg in di: Ussa avain nus pudì viver noss hobi, ussa èsi bun uschia.
Suenter tschintg onns han els stuì realisar ch'il squitsch da daners aveva prendì il plaschair da la producziun da glatsch. Uschia èn els sa decidids da vender lur utensils e da chalar da far glatsch.
Reto Lazzarini na stat dentant insumma betg mal per quai ch'el ha producì glatsch e chalà. «Tut quai ch'è capità, pens jau: Quai ha stuì esser uschia, e quai vuleva jau uschia.» E propi chalà dal tut n'ha el betg, tradescha Reto Lazzarini. En l'abitaziun da Reto Lazzarini stat anc ina pitschna maschina da far glatsch. E durant la stad fa el mintgatant anc glatsch – ma be per el e sia partenaria.