La stagiun d'enviern 2022/23 saja stada catastrofala per las pendicularas da Tschiertschen. Sulet 12 dis èsi stà pussaivel d'ir sin pista en il territori che n'ha nagins indrizs da far naiv. Cler, quai n'è betg bun per las finanzas. Vitiers vegn che las pendicularas ston investir ils proxims onns en il mantegniment da sutgeras u runals. Questas investiziuns na pon las pendicularas betg finanziar sulettas. Perquai collavuran las pendicularas cun la vischnanca Tschiertschen-Praden.
Nus lain vinavant giugar ina rolla impurtanta en il turissem d'enviern.
Per mantegnair il turissem d'enviern a Tschiertschen dovri betg be daners, mabain er ina basa legala. Fin zercladur ha la radunanza communala approvà ina nova lescha ch'empermetta omadus. Tranter auter prevesa quella d'augmentar las taxas da turissem per il dubel. Hotels sco er privats che dattan a fit chombras ston pia pajar dapli a la vischnanca. Entras quests ed auters augments da taglia contribuescha la vischnanca mintg'onn 200'000 francs a las pendicularas. Vitiers vegn ina contribuziun annuala da 300'000 francs en favur d'in fond per finanziar las renovaziuns dals indrizs turistics.
La finamira è da segirar il turissem en vischnanca per las proximas generaziuns.
La finala grond sustegn da populaziun
Da principi sajan ils e las da Tschiertschen-Praden loschs da lur identitad sco lieu da turissem. I haja però duvrà temp per persvader la populaziun da sustegnair la nova lescha da turissem. Cura che la populaziun da radund 300 persunas haja però constatà tge ch'els perdessan senza il territori, lura saja quai sa midà. La stizun dal vitg, la posta ed era la maisa radunda dessi – senza pendicularas – numnadamain betg pli, uschia il president communal Roderick Galantay. Uschia ha la radunanza communala approvà cun gronda maioritad il pachet da mesiras cun quel che las pendicularas vegnan da surmuntar ils proxims onns.
Sch'i va vinavant sco fin uss tanschan las finanzas enfin ch'i n'ha nagina naiv pli. A partir da l'onn 2035 pudessi puspè vegnir pli grev.
Er las pendicularas han fatg midadas lur cudeschs da finanzas. Per l'ina ha la radunanza generala extraordinaria da las pendicularas decis da reducir la valur da las aczias (da 100 sin 60 francs). Per l'autra auzan las pendicularas il chapital d'aczias cun vender novas aczias. Auter che sin nivel communal n'haja strusch dà discussiuns. La finala giaja quai per garantir il manaschi dal pitschen territori da skis cun 32 kilometers pista da skis. Enfin ch'i haja avunda naiv per far pistas en il territori da skis, che giascha sin ina spunda vers nord tranter 1350 e radund 2400 meters sur mar, saja las finanzas garantidas. Tut tenor calculaziuns saja quai en 10 fin 20 onns.
Or da l'archiv: Stretgas finanzialas è nagut nov a Tschiertschen. Il territori pitschen senza infrastructura d'ennavar è perquai adina puspè stada a la tschertga da soluziuns.
