Thunberg ha crititgà las participantas ed ils participants dal WEF. Ins taidlia là tiers a la glieud che promovia il pli ferm la destrucziun dal planet, ha ella ditg. Ins duai enstagl tadlar sin ils carstgauns «ch’èn effectivamain pertutgad da la crisa dal clima».
Renfatschas als concerns d'energia
Tar la discussiun ha Thunberg renfatschà a l’industria d’energia che quella giaja uschè lunsch sco ch’ella possia. «Els vegnan ad investir vinavant en energias fossilas, els vegnan vinavant a sacrifitgar umans per lur agen profit», ha ditg Thunberg vinavant.
A las elitas d'economia e politica fa ella la renfatscha che «engurdientscha» e «gudogns economics a curta vista» sajan pli impurtants ch'ils carstgauns ed il planet.
Er il directur da l'Agentura internaziunala d'energia (IEA) Fatih Birol è sa participà a la conferenza da medias. «Mia preschientscha qua è in signal fitg impurtant che jau vuless dar al mund», ha lez ditg. «La midada dal clima dovra dapli attenziun. Deplorablamain sa reducescha l’attenziun per la midada dal clima».
Petiziun per managers d'ieli
Sper Thunberg èn er sa participadas las activistas Vanessa Nakate da l’Uganda, Helena Gualinga da l’Ecuador e Luisa Neubauer da la Germania. Ensemen han ellas preschentà ina «decleraziun d'omissiun» per manaders da concerns d’ieli multinaziunals sco part d’ina petiziun online.
Las activistas dal clima pretendan dals concerns da sistir l'extracziun d’ieli, dal charvun e dal gas e da «betg bloccar pli ditg la transiziun ad energia schubra». Passa 850'000 persunas han gia suttascrit la petiziun online.
