La firma grischuna laschia lavurar ils firads e las fin d'emnas, quai che cuntrafà a la lescha. Ils emploiads na sa lamentian betg mo ch'els na survegnian nagins suppelments per sururas u lavur da notg e fin d'emnas, er il rendaquint dad uras vegnia manipulà u tschentà ora fauss.
Plant penal cunter Tscharner SA
La Unia ha inoltrà in plant penal cunter l'interpresa. La cugliunaria da paja dals ultims onns muntia plirs milliuns francs. Il sindicat pretenda in agir spert e dir da la cumissiun paritetica ch'è actualmain vid investigar en chaussa.
Polizia ha intercurì sedia a Domat
La procura publica ha en mintga cas instradà ina procedura penala cunter il maina-fatschenta da la firma da palancaus Tscharner. La polizia haja era intercurì la sedia da la firma a Domat, ha la procura publica confermà sin dumonda dad RTR.
Tscharner SA refusa rinfatschas
Il maina-fatschenta da Tscharner sco era ses advocat n’han betg vulì prender posiziun en chaussa, cunquai che la procedura penala cuzza anc. L'advocat di mo tant: Las rinfatschas che l'Unia fetschia, sajan citat "jenseits von gut und böse".
RR novitads 12:00