177 istorgias davart ils morts da Falein

L’Uniun Parc Ela ha lantschà il zercladur ensemen cun il servetsch archeologic dal Grischun l’occurenza da scriver «Ils morts da Falein». Ina giuria ha ussa tschernì las meglras da las 177 istorgias inoltradas. Quai scriva il Parc Ela en ina communicaziun.

In per dals skelets chattads a Falein. Bild in Lightbox öffnen.

Legenda da maletgs: In per dals skelets chattads a Falein. mad

Sco basa per la concurrenza da crimi vala il chat misterius dad ossa l’atun 2014 a Falein sur Filisur. Là èn vegnids chattads dus chavazzas umanas e divers oss ch’han ina vegliadetgna da 1200 onns.

Las victuras ed ils victurs

Las meglras istorgias èn vegnidas da Stephan Peter Johannes Cramer da Minca (D), Manfred Haag da Pfäfers (CH), Thomas Kurze da Frankfurt (D), Noëmi Sacher Stojanov da Arth (CH), Clara-Sophie Schwarz da Zehnhausen (D), Thomas Stumpf da Rodalben (D), Andreas Ulich, Bamberg (D), e cun in’istorgia rumantscha Paula Casutt da Falera (CH).

Exposiziun a Bravuogn

Ils victurs vegnan preschentads al «Bergfahrt Festival» a Bravuogn ils 18. da zercladur 2016. A la surdada dals premis vegn l’actur Grischun Gian Rupf a preleger l’istorgia ch’ha gudagnà la concurrenza. Il medem temp expona il servetsch archeologic ils chats da skelets, plinavant datti ina staziun cun audios cun ils megliers otg crimis.