Siglir tar il cuntegn

Header

cuntegn

Grischun Central 182 naschientschas en Ospital regiunal Tusaun

L’onn passà ha l'Ospital regiunal a Tusaun nudà in dumber da naschientschas uschè aut sco paucas giadas en l'istorgia da passa 100 onns: 182 uffants èn vegnids parturids en l’ospital. Plinavant ha l’ospital fatg il 2015 radund 8% dapli tractaments.

Il quint da l'ospital serra cun in deficit da 363’145.76 francs. Quai èn radund 80'000 francs dapli che l'onn 2014, dentant cleramain sut il deficit budgetà.

Uschia haja l’ospital cuntanschì in «bun resultat annual» – malgrà ils segns disfavuraivels: L’ospital sto numnadamain pajar enavos totalmain ca. 865’000 francs pervi da decisiuns dal Tribunal administrativ federal.

Investì radund 660'000 francs

Totalmain 1862 tractaments noda l’ospital per il 2015 (+ ca. 8%). Il pli grond augment da tractaments hai dà en la partiziun chirurgia. Dasper quai hai dà 182 naschientschas en l’ospital regiunal.

Er per il futur para l’organisaziun d’esser pinada. Ella ha investì per novs letgs da pazients, in nov apparat d’ultrasun ed in nov tunnel per l’apparat da tomografia. Las grondas investiziuns muntan a radund 660’000 francs, uschia èsi da leger en il rapport annual.

RR novitads 11:00

Artitgels legids il pli savens