Siglir tar il cuntegn

Header

Video
Mussie Zerai – il nunstanclentaivel
Or da Battaporta dals 29.10.2015.
laschar ir
cuntegn

Grischun Central 25avels Dis da film a Tusaun èn stads in success

Il pli grond ed il pli vegl festival da film dal Grischun è daventà 25. Durant ils dis da film a Tusaun èn vegnids mussads 40 films da 20 differents pajais. Ils organisaturs èn cuntents, malgrà ch'ins ha constatà in zichel damain aspectaturs.

En tut han rodund 3300 persunas guardà ils films preschentads a Tusaun el Kino Rätia. L'aura è stada durant ils sis dis dal festival per gronda part fitg bella e quai è probabel s'effectuà sin il dumber da visitaders, ha ditg Hans Hartmann dal comité d'organisaziun a Radiotelevisiun Svizra Rumantscha. Tenor Hans Hartmann na procuria questa pitschna digren d'aspectaturs era betg per in problem finanzial. Pli impurtant ch'il dumber da visitaders è l'atmosfera per ils organisaturs e quella saja stada fitg buna ha ditg Hans Hartmann.

Durant il festival dal film a Tusaun eran da vesair films da tut las spartas. Il focus è però stà sin la migraziun, nua ch’i va per fugias, l’emigraziun ed temas d’asil.

Giast e referent als dis dal film è tranter auter il spiritual catolic Mussie Zerai stà, che s’engascha qua en Svizra per ses cumpatriots da l’Eritrea che dovran agid.

Dapi ch'i dat ils Dis dal film a Tusaun è Hans Hartmann en il comité d'organisaziun.
Legenda: Dapi ch'i dat ils Dis dal film a Tusaun è Hans Hartmann en il comité d'organisaziun. RTR, F. Belotti
Jau sun surstà ch'i dat anc adina nus.
Autur: Hans Hartmanncomité d'organisaziun

Gia da l’entschatta davent en il comité d’organisaziun dals Dis dal film mundial a Tusaun è Hans Hartmann. El è losch da pudair organisar gia dapi 25 onns ils dis dal film: «Jau sun surstà ch’i dat anc adina suenter quest lung temp, i dat bellas e main bellas lavurs che jau hai fatg fin oz, tar las main bunas lavurs èn per exempel la tschertga da daners», uschia il cineast dal kino da Tusaun.

Ina reclama al stradun a Tusaun.
Legenda: Ina reclama al stradun a Tusaun. RTR, F. Belotti

El è persvadì ch’ils Dis da film han in bun avegnir. Grazia l’uniun da promoturs dals dis dal film duai quai era esser pussaivel ils proxims onns da finanziar ils dis da film, uschia Hartmann.