Siglir tar il cuntegn

Header

Fotomontascha dal project hotel da wellness e ressort da vacanzas Viols a Savognin.
Legenda: Fotomontascha dal project hotel da wellness e ressort da vacanzas Viols a Savognin. MAD
cuntegn

Grischun Central 4 milliuns per 106 milliuns

La vischnanca da Savognin vul sa participar cun ina contribuziun da 4 milliuns francs vi dal project per in bogn a Lai Barnagn. Quai scriva la vischnanca en il messadi per la radunanza communala dals 16 da november.

Envers Radiotelevisiun Svizra Rumantscha ha il president communal Patric Vincenz explitgà ils motivs, pertge ch'ils investiders pretendan questa contribuziun. La raschun saja ch’il bogn planisà saja public. Ed uschia giavischian ils investiders, che la vischnanca sa participeschia vi dals custs d’investiziun da quest bogn.

En tut vegnan investids 106 milliuns en il project che cumpiglia sper il bogn era in hotel da 3 stailas ed 8 chasas cun abitaziuns economisadas. Cunquai ch'il bogn vegn ad esser deficitars, preveda Savognin era ina contribuziun annuala da 400’000 francs. Davart quella sto lura la nova vischnanca fusiunada Surses decider pli tard.