50 onns tunnel dal San Bernardino

Il prim da december 1967 è vegnì avert il tunnel dal San Bernardino. Il nord ed il sid dal Grischun han uschia survegnì ina colliaziun directa per tut l’onn. Prominenza da l’entira Svizra è stada preschenta a las festas d’inauguraziun.

Laschar ir video «Festa per ils 50 onns tunnel dal San Bernardino»

Festa per ils 50 onns tunnel dal San Bernardino

2:46 min, Actualitad video dals 3.12.2017

Il tunnel dal San Bernardino è vegnì bajegià durant la conjunctura auta. 140 milliuns francs ha el custà da lezzas uras. Quai correspundess oz a var 800 milliuns francs. En tut han 6'500 persunas lavurà vi dal tunnel e prestà 7 milliuns uras da lavur. 1’000 accidents hai dà, 11 lavurants èn morts sin il plazzal. Lur nums èn gravads sin ina tavla commemorativa a la sortida en il sid dal tunnel.

Sursiglir cuntegn supplementar

Tunnel dal San Bernardino

Lunghezza – 6,6 km
autezza portal dal nord – 1613 m.s.m
autezza portal dal sid 1631 m.s.m.
cumenzament da las lavurs 1967
sanaziun dal tunnel da 1992-2007
custs totals: 140 milliuns francs

Lavurs da sanaziun vid il tunnel dal San Bernardino

Il traffic sin la via è adina creschì pli ferm ed uschia han gia 25 onns suenter l’avertura stuì vegnir fatg las emprimas lavurs da sanaziun. En tut han ellas cuzzà dal 1992 fin il 2007, uschia che quellas èn idas a fin exact avant diesch onns.

Festa commemorativa

La sonda ils 2 da december è hai dà a San Bernardino ina festa davart il giubileum da 50 onns dal tunnel. Tranter auter hai dà in discurs da podi cun differents represchentants da la politica, turissem e l’economia. Preschent è era stà il cusseglier guvernativ Mario Cavigelli.

RR actualitad 12:00

Emissiun tar quest artitgel