Siglir tar il cuntegn
Inhalt

Grischun Central A13 tar Ziràn – collisiun da 3 autos

Tar ina manevra da vargar èsi vegnì tar ina collisiun cun 3 autos. 5 persunas èn vegnidas levamain blessadas, ha communitgà la polizia.

la situaziun da l'accident sin via cun trais autos donnegiads.
Legenda: Tschintg persunas èn vegnidas blessadas levamain tar ina collisiun da trais autos. Keystone

In automobilist è viagià sin l’A13 vers Ziràn nua ch’el vuleva vargar. Là è el collidà cun in auto che vegniva da la cuntradirecziun. In terz auto è er vegnì involvà en l’accident.

Per salvar las persunas blessadas eran dus helicopters da la Rega, in’ambulanza da Tusaun ed ina da Cuira en acziun. Ils autos han in donn total.

L’autostrada A13 tranter Andeer e Ziràn era vegnida serrada per dus uras en omaduas direcziuns. Co che la collisiun è capitada vegn examinà.

Avant duas emnas aveva quai gia dà in grev accident sin l’A13 datiers da la sortida da Panaduz. Dus autos eran collidads e tschintg da sis persunas eran vegnidas grev blessadas.

RR novitads 14:00