La vischnanca da Surses lavura vi d’in studi, che duai mussar tge alternativas ch’i dat da cuntanscher Radons senza skis. Sco quai che Leo Thomann, il president communal, ha ditg sin dumonda, dettia tschintg variantas pussaivlas. Tuttas prevesan da nizzegiar u renovar vias existentas, per far charrablas questas per in bus public.
Il pli simpel saja da duvrar via existenta
I dat variantas davent da Savognin, e variantas davent da Tigignas. La varianta la pli simpla saja quella da Tigignas – Fotgs Sot – Rasliung – Radons, che va sur la via existenta cun paucas adattaziuns vi da la via. Quai duess esser pussaivel da realisar per 160’000 francs. Quels custs sa cumponan uschia: rumir naiv 100’000 francs, cumissiun da lavinas e siglientar lavinas 10’000 francs, bus da 12 persunas e manischunz 40’000 francs e custs imprevis 10’000 francs. Tenor Leo Thomann duai dar in tact d’in’ura, quai dat ina capacitad da 150 persunas transportadas al di. Questa soluziun saja pussaivla da realisar gia sin l’enviern 2016/17. Proximamain vegn la vischnanca Surses a discutar ils plans cun las pendicularas, il turissem ed ils ustiers da Radons.
Pendiculara fiss memia chara
Nagin’alternativa saja da reactivar il Snowliner u la construcziun d’ina pendiculara nova: Cun custs da 25 fin 35 milliuns francs na saja betg pussaivel da finanziar ina pendiculara nova, ha ditg Leo Thomann.