Acla sur Andeer en Val Schons - A Bavugls datti per l'emprima giada ina serenera da plantas

Ina saira durant star avant chamona e baterlar ha Mattia Mani constatà ensemen cun in collega ch'els hajan il medem problem. Numnadamain in problem da tualetta. Colliar l'anteriura stalla cun ils indrizs ch'èn avant maun n'era betg lubì pervia da las premissas dal chantun. Spert era decidì ch'els fetschian insatge.

Senza indrizs tecnics e vanzadiras

Mattia Mani ha cumenzà a s’infurmar tgenins sistems per schubregiar aua duvrada ch'i dat insumma e tge che fiss adattà per l'acla. Ils blers sistems lavuran cun indrizs tecnics e dovran electricitad. Quels n'en betg adattads per in'acla senza access a la rait d'electricitad. Vinavant datti tuttina anc vanzadiras che ston vegnir manadas a val e dismessas en la serenera communala. Bainspert è el vegnì en contact cun la serenera biologica da plantas. Quella funcziunescha senza electricitad, cun nizzegiar la differenza d'autezza. Las substanzas solidas che restan daventan cumpost uschia na datti nagut per charrar a val e dismetter.

Legenda: Mattia Mani, in dals dus iniziants dal project sper l'era da serenera a Bavugls. RTR, Giana Maria Cantieni

Ina schliaziun cuminaivla

Fitg impurtant per ils dus iniziants era da chattar ina schliaziun che tut quels che vulan, pon sa participar e colliar lur chamonas. La fin finala èn set chamonas colliadas cun la serenera biologica da plantas. Cun quai ch'els avevan a disposiziun maschinas da lur manaschis e la gronda part dals participants è talentada artisanal han els construì sez la serenera da plantas. Quantas uras da lavur ch'igl ha duvrà na san els betg dir. Ils custs da circa 40'000 francs han els partì.

Tras quest project hai jau survegnì tut in'autra relaziun tar fecalias

Visiun per il futur

Per Mattia Mani, in dals iniziants da la serenera biologica è la tgira da la serenera daventà in hobi ils davos trais onns. El sa giavischass, che la glieud havess impà dapli cunscienzia per il rument ch'ella producescha mintga di. Sia visiun per il futur è che tuttas chamonas da Bavugls fissan in di colliadas cun la serenera biologica.

1 / 10

Legenda: Tualetta cuminaivla La latrina da vart dretga da la chamona era la tualetta communabla da pli bauld. Giana Maria Cantieni

2 / 10

Legenda: Chamona da Mattia Mani Quell'anteriura stalla han Mattia Mani e ses frar bajegia or. Qua è il problem da tualetta daventà acut. Giana Maria Cantieni

3 / 10

Legenda: Emprim pass da la serenera biologica En qua sa chatta il recipient che tegna si las substanzas insolublas. Giana Maria Cantieni

4 / 10

Legenda: Recipient per substanzas insolublas Il recipient è permeabel; las substanzas insolublas restan en il recipient. L'aua duvrada va vinavant tar il segund pass da schubregiar. Giana Maria Cantieni

5 / 10

Legenda: Foss da la serenera Qua sa rimna l'aua duvrada. Sch'l foss è plain vegn el svidà. L'aua vegn squittada sur l'era da serenera. Giana Maria Cantieni

6 / 10

Legenda: Era da la serenera da plantas Giana Maria Cantieni

7 / 10

Legenda: Era da serenera cun plantas indigenas L'era è emplantada cun plantas indigenas or da in territori da palì dal Parc natiral Beverin. Giana Maria Cantieni

8 / 10

Legenda: Aua schubregiada Qua sa rimna l'aua schubregiada e sfundra lura en il prà. Giana Maria Cantieni

9 / 10

Legenda: Prova da controlla Quai è la prova da controlla che Thomas Maron dal Uffizi per la natira e l'ambient dal Grischun ha laschà analisar en il labor chantunal. Thomas Maron

10 / 10

Legenda: Part dal sid da l'acla Bavugls Qua sa chattan las set chamonas che èn colliadas a la serenera da plantas Giana Maria Cantieni