Siglir tar il cuntegn

Header

audio
La nova serenera da Bavugls
Or da Actualitad dals 07.09.2021.
laschar ir. Durada: 3 minutas 40 Secundas.
cuntegn

Acla sur Andeer en Val Schons A Bavugls datti per l'emprima giada ina serenera da plantas

I dat ina schliaziun communabla per l'aua persa da set chamonas a Bavugls, l'acla sur Andeer. La nova serenera da plantas funcziunescha biologicamain.

Ina saira durant star avant chamona e baterlar ha Mattia Mani constatà ensemen cun in collega ch'els hajan il medem problem. Numnadamain in problem da tualetta. Colliar l'anteriura stalla cun ils indrizs ch'èn avant maun n'era betg lubì pervia da las premissas dal chantun. Spert era decidì ch'els fetschian insatge.

Senza indrizs tecnics e vanzadiras

Mattia Mani ha cumenzà a s’infurmar tgenins sistems per schubregiar aua duvrada ch'i dat insumma e tge che fiss adattà per l'acla. Ils blers sistems lavuran cun indrizs tecnics e dovran electricitad. Quels n'en betg adattads per in'acla senza access a la rait d'electricitad. Vinavant datti tuttina anc vanzadiras che ston vegnir manadas a val e dismessas en la serenera communala. Bainspert è el vegnì en contact cun la serenera biologica da plantas. Quella funcziunescha senza electricitad, cun nizzegiar la differenza d'autezza. Las substanzas solidas che restan daventan cumpost uschia na datti nagut per charrar a val e dismetter.

Um da 43 ons cun egliers, pullover nair e chaultschas grischas. Davos in'era cun saiv ed larischs
Legenda: Mattia Mani, in dals dus iniziants dal project sper l'era da serenera a Bavugls. RTR, Giana Maria Cantieni

Ina schliaziun cuminaivla

Fitg impurtant per ils dus iniziants era da chattar ina schliaziun che tut quels che vulan, pon sa participar e colliar lur chamonas. La fin finala èn set chamonas colliadas cun la serenera biologica da plantas. Cun quai ch'els avevan a disposiziun maschinas da lur manaschis e la gronda part dals participants è talentada artisanal han els construì sez la serenera da plantas. Quantas uras da lavur ch'igl ha duvrà na san els betg dir. Ils custs da circa 40'000 francs han els partì.

Tras quest project hai jau survegnì tut in'autra relaziun tar fecalias
Autur: Mattia Mani iniziant da la serenera da plantas

Visiun per il futur

Per Mattia Mani, in dals iniziants da la serenera biologica è la tgira da la serenera daventà in hobi ils davos trais onns. El sa giavischass, che la glieud havess impà dapli cunscienzia per il rument ch'ella producescha mintga di. Sia visiun per il futur è che tuttas chamonas da Bavugls fissan in di colliadas cun la serenera biologica.

RTR actualitad 07:00

Artitgels legids il pli savens