Siglir tar il cuntegn

Header

audio
Agricultura persistenta: L'idea dal project grischun cun 50 manaschis
Or da Actualitad dals 05.08.2021.
laschar ir. Durada: 3 minutas 20 Secundas.
cuntegn

Agricultura Purs fan lavur da pionier

50 purs dal Grischun pon sa participar al project «Agricultura grischuna neutrala al clima». L’entschatta da l’onn è il project vegnì lantschà. Per ils proxims tschintg onns metta il chantun a disposiziun ina summa da 6,4 milliuns francs.

«Nus vulain esser l’emprim chantun da la Svizra, che producescha tut sias victualias neutral al clima. Nus essan pertscherts che quai è ina visiun ambiziunada che nus avain. Quai n’è dentant betg mo ina sgnocca da reclama, quai è interess serius che nus persequitain», uschia Claudio Müller da la Rait da maschinas Grischun che maina il project.

video
Puras e purs prestan lavur da piunier: lur manaschis duain daventar neutrals al clima
Or da sil punct dals 05.08.2021.
laschar ir. Durada: 1 minuta 39 Secundas.

Betg tuts che vulan pon sa participar

Radund 120 bains purils dal Grischun èn s'annunziads per il project. Da quels pon 50 bains purils da divers secturs e parts dal chantun sa participar al project.

Nus avain per exempel d'elavurar la grascha en cumpost, la dumonda è alura adina enfin che nus avain elavurà la grascha en cumpost, quantas emissiuns datti alura. Quai è insatge fitg interessant, chat jau, ch’ins po discutar en la gruppa. Quai è ina varianta. Suenter avain nus il pavel, cun pavlar datti la pussaivladad da reducir l’amoniac ed il metan, avant ch’el va ora sin il prà u en la puschinera.
Autur: Mirco Uffer pur da Cunter

Sustegn datti tant nà da las ideas sco era finanzialmain. Il mument è il project en la fasa da rimnar ideas. Fin il december da quest onn duain tut ils manaschis da pilot esser bilantschads.

Participà al project èn l’Uffizi d’agricultura e da geoinfurmaziun, l’Uniun purila grischuna, Bio Grischun, il Plantahof, la Rait da maschinas Grischun sco er la firma da cussegliaziun agrara Flury & Giuliani.

RTR actualitad 07:00 / sil punct 17:45

Artitgels legids il pli savens

Scrollar a sanestra Scrollar a dretga