Grischun Central - Alain Berset inaugurescha la tur sin il Güglia
Il minister da cultura Alain Berset ha inaugurà la tur d’Origen, la sala da teater che simbolisescha la tur da Babilon. I ha dà divers pleds d’avertura, quai cumbinà cun scenas or dal toc «Apocalipsa» da Gion Antoni Derungs, ch’ha gievgia proxima sia premiera.
En ses pled d’avertura ha Alain Berset tranter auter ditg, che la tur sin il pass dal Güglia saja in lieu tut spezial che simboliseschia il cunfin tranter grondas regiuns culturalas e da lingua en l’Europa. Il Güglia saja ina metafra per la diversitad a la Svizra, per il barat cultural, per l’identitad e per l’avertura.
L’avertura da l’opera «Apocalipsa» en trais linguas da Gion Antoni Derungs è gia vendida ora, sulet il concert supplementar dals set d’avust datti anc plaz libers. Il lieu dal concert è cuntanschibel mo cun l’auto da posta. Il project cultural da plirs milliuns francs vegn sustegnì dal chantun cun ina garanzia da deficit da 680’000 francs.
1 / 5
Legenda:
Blera glieud è vegnida a l'avertura da la tur sin il pass dal Güglia.
RTR, Federico Belotti
2 / 5
Legenda:
La tur sin il Güglia curt avant l'avertura.
RTR, Federico Belotti
3 / 5
Legenda:
Sergei Polunin, il saltunz da ballet prominent da l'Ucraina.
RTR, Federico Belotti
4 / 5
Legenda:
Vista vers las etaschas las pli autas.
RTR, Federico Belotti
5 / 5
Legenda:
Il cusseglier federal Alain Berset durant ses pled d'avertura in di avant l'emprim d'avust.
RTR, Federico Belotti
