La lescha da linguas da la vischnanca Albula/Alvra prevesa, che publicaziuns impurtantas cumparan en rumantsch ed en tudestg.
Envers la vischnanca èsi pussaivel da sa drizzar en rumantsch sco era en tudestg. La resposta succeda en la lingua da la dumonda.
Plinavant vul la vischnanca promover organisaziuns, che s’engaschan per il rumantsch. Vegnan plazzas scrittas ora ed i dat candidaturas cun medemas qualificaziuns, alura duess vegnir emploià il candidat che discurra omaduas linguas uffizialas.
Lescha sco a Glion
La lescha da linguas e la promoziun dal rumantsch da la vischnanca Albula/Alvra è sumeglianta a quella da la vischnanca da Glion, ch’ha decidì avant bun in onn.
Radunanza communala accepta ulteriuras tractandas
Plinavant ha il suveran da la vischnanca Albula/Alvra acceptà la lescha dals dis da paus, en la lescha vegnan era regladas las uras d'avertura. Uschia pon butias che vendan nutriment era avrir las dumengias. Accepà è era vegnida la lescha da l'utilisaziun da la rait e furniziun d'energia electrica.
RR novitads 06:00