Siglir tar il cuntegn

Grischun Central Albula/Alvra approvescha tut las tractandas

La radunanza communala da la vischnanca Albula/Alvra da mesemna saira ha approvà la lescha d’ustaria, il concept da pastgiras e bavraduirs, il project da rimnada equitaziun ed avertura 2018, il concept per l’economisaziun da rument «Molok» e la sanaziun da la via Cumpogna, scriva la vischnanca.

En l'avegnir duessan quels containers da rument betg pli dad esser visibels en vischnanca, ed era la lescha d'ustarias è sut tetg.
Legenda: En l'avegnir duessan containers da rument betg pli dad esser visibels en vischnanca sco qua a Casti, ed era la lescha d'ustarias è sut tetg. RTR, Federico Belotti

La lescha d’ustarias reglescha tranter auter las lubientschas, las uras d’averturas sco era las taxas da las ustarias. La lescha è suttamessa al referendum facultativ. La suprastanza communala vegn a decider davart il termin cura che la lescha duai ir en vigur.

Alps pli modernas

Per il concept da pastgiras e bavraduirs è vegnì approvà in credit da 575’000 francs. La vischnanca quinta cun in sustegn finanzial dal chantun e da la confederaziun. I vegn a dar meglieraziuns ed in engrondiment dals bavraduirs da las mulscheras Aclas, Valiabgias, Curmegl e l’Alp da la Creusch, per correspunder a las pretensiuns dad ozendi quai che pertutga las prescripziuns d’animals e la protecziun da las auas.

Via Fops vegn renovada

Per il project da rimnada equipaziun ed avertura 2018 è vegnì approvà in credit brut da 575’000 francs. Il project cumpiglia la renovaziun da la via da guaud Fops, che va davent da Sisseals (hotel Mistail, Alvaschagn), enfin tar il reservuar d’aua Val da Rand en la fracziun da Casti.

Dapertut Moloks

Per endrizzar lieus da rimnada unitars en tut las fracziuns, è vegnì approvà in credit brut da 350’000 francs. Mesiras pli grondas dovria quai surtut en las fracziuns da Brinzauls, Casti (emprima etappa), Alvaschagn, Mon e Surava (segund’etappa).

Via Cumpogna custa damain che la mesadad

Plinavant ha la radunanza communala infurmà davart la sanaziun da la Veia Cumpogna. Quella haja custà 390’240 francs e betg 898’000 francs sco budgetà. La gronda differenza saja d’attribuir al fatg, ch’ins haja betg stuì sanar la rasada da fundament, ed era las lingias industrialas sajan stadas en in meglier stan che spetgà.

Daniel Albertin acceptass elecziun en il Cussegl grond

Sut varia ha il president communal Daniel Albertin empruvà, da declerar sia decisiun da na betg candidar pli per il Cussegl grond. El haja ina giada empermess da desister sin ina candidatura per il cussegl grond, sch’il circul Alvaschagn avess suenter la fusiun da vischnanca vinavant dad avair il dretg sin in sezs da dus en il cussegl grond.

Uschia haja el decidì da desister sin la candidatura per il cussegl grond en favur dal circul da Belfort (Surava). Sch’i saja dentant la veglia dal pievel, alura stettia el vinavant a disposiziun per il cussegl grond. Vul dir, en il cas ch’el vegniss elegì, lura acceptass el l’elecziun.

Scolà «first responders»

Era sut varia ha la vischnanca infurmà davart l’organisaziun First Responder. Quella cumenza l’emprim da matg. Sco zona d’acziun è vegnida definida la regiun Alvra e Filisur. Divers voluntaris èn vegnidas scoladas per dar in emprim agid. Las persunas vegnan en acziun avant ch’ils servetschs da salvament èn al lieu. Sch’ils «First responders» vegnan en acziun, decida mintgamai il servetsch d’agid 144.

RR novitads 12:00