La vischnanca Albula/Alvra cunfinescha cun divers centers turistics. Per Daniel Albertin il president communal na aja betg uschè simpel da dir a tge organisaziun turistica ch’ins veglia dar la preferenza en l’avegnir. « Nossa vischnanca è turisticamain drizzada vers il Surses, vers Lai, vers Bravuogn e Filisur e schizunt era vers Tavau ». Uschia saja la lescha da turissem ina da las grevas lescha ch’i valia da realisar, uschia Daniel Albertin.
Betg anc decidì cun tgi collavurar
In pass impurtant saja ussa però fatg, cun il gea da Surses al Parc Ela. Quai saja in grond avantatg cun quai che la collavuraziun cun l’uniun Parc Ela saja en mintga cas fitg impurtanta. Ins haja però betg anc decidì, sch’ins veglia alura era sa participar vi da la Turissem Savognin Bivio Alvra (TSBA) SA, tut saja anc avert uschia Albertin.
Purschida gratuita per turists
Il mument paja la vischnanca Albula/Alvra mintg’onn 200'000 francs per il turissem, senza d’incassar taxas da turissem. Tranter auter survegnian ils turists da la Val Alvra la Ela Card, cun la tala igl è pussaivel da nizzegiar la stad gratuit la pendiculara da Savognin.
I deva gia taxas da turissem
Las davosas fracziuns da la vischnanca Albula/Alvra ch’incassavan taxas da turissem èn stads Brinzauls ed Alvagni. Quellas leschas èn però avant circa dus onns vegnidas schliadas, per betg chaschunar per ina malgistadad entaifer la vischnanca.