Siglir tar il cuntegn

Header

cuntegn

Grischun Central Albula/Alvra: President è vegnì reelegì

Daniel Albertin è vegnì elegì sco president da la vischnanca d'Alvra la dumengia passada. Sco la vischnanca communitgescha è la participaziun a l’elecziun stada tar stgars 19%.

Daniel Albertin da Mon, il president communal actual da la vischnanca Albula/Alvra, è stà l’unic candidat per quest post tar la tscherna a l’urna ed uschia n'hai strusch dà ina tensiun. A l’anteriur deputà e pur vegn en general attribuì ch'el fetschia buna lavur, era sch’i dat adina puspè vuschs criticas cunter sia persuna. Realitad è che Albertin è vegnì reelegì sco president communal da la vischnanca Albula/Alvra.

La participaziun cun stgars 19% è stada fitg magra. Avant quatter onns tar si’emprima elecziun sco president da la nova vischnanca fusiunada era la participaziun almain anc stada tar 30%. Là aveva el survegnì 235 vuschs e cedels vids eran entrads 23. Dumengia ha Albertin obtegnì 172 vuschs tar ina maioritad absoluta da 93 vuschs. Remartgabel è che dals 184 cedels valaivels era mo in vid.

Damai resta il president communal actual da la vischnanca Albula/Alvra era per ils proxims quatter onns al timun da la vischnanca ch’ha 995 votantas e votants. Ils sis commembers da la suprastanza vegnan elegids pli tard

Artitgels legids il pli savens