La vischnanca d’Alvra quinta per l’onn 2024 cun in deficit da 775’200 francs, tar expensas da radund 19,2 milliuns francs. La radunanza communala ha approvà unanimamain quest preventiv – ed ha plinavant decidì da laschar il pe da taglia sin 100% da la taglia chantunala simpla.
Il quint d’investiziuns prevesa expensas bruttas da bunamain 15 milliuns francs. Da quai vegn investì 8,78 milliuns per realisar ils projects en connex cun la bova da Brinzauls.
Projects da vias
Ultra da quai ha la radunanza communala d’Alvra approvà unanimamain plirs projects per sanar vias. En tut stattan uschia a disposiziun var 1,4 milliuns francs per ils projects «Alp da la Creusch» ad Alvagni, «Culm da Solas» a Stierva, e per la sanaziun da la Voia d’Aclas ad Alvagni. Per ils dus projects po la vischnanca quintar cun subvenziuns dal chantun en l’autezza da radund 565'000 francs.