Siglir tar il cuntegn

Header

Navigaziun

cuntegn

Grischun Central Alvagni: Onn difficil per Nido del Lupo

L’asil per giuvenils en situaziuns difficilas ch’è vegnì fundà avant 11 onns porscha plaz ad otg giuvnas e giuvens. L’onn 2018 è stà in onn difficil per la chasa, ella ha fatg in deficit da 100'000 francs. Quai ha sminuì las reservas. La raschun per il deficit è la mancanza temporara da giuvenils.

Sco quai ch’il manader e confundatur da Nido del Lupo, Fabio Botta, ha ditg envers RTR, saja la situaziun puspè sa meglierada. Il mument sajan tschintg dals otg plaz occupads, ed i sajan en vista ulteriurs giuvenils. Sche tut giaja tenor plan possian ins quest onn puspè serrar giu cun in gudogn u cun ina nulla naira, per betg duvrar si dapli da las reservas ch’èn il mument circa tar 200'000 francs.

Lescha problematica

Sco grond problem vesa Botta la lescha vertenta. Uschia sajan en general ils geniturs responsabels da finanziar la dimora en l’asil che porscha ina scola, ina purschida cun pedagogia da circus e projects da lavur. El haja gia gì varsaquants discurs cun geniturs che tramettessan gugent lur uffant en l’asil ad Alvagni, la fin finala sa decidian els però cunter perquai ch’els na sajan betg abels da finanziar la purschida che custia radund 10'000 francs il mais per mintga avdant. Cun quai che la chasa Nido del Lupo è in asil cun cumpetenzas d’educaziun spezialisadas, na sto betg il chantun finanziar il segiurn dals giuvenils mabain ils geniturs u la vischnanca. Botta giavischass midadas en la lescha.

Deputà fa segn da dumonda

In segn da dumonda en chaussa ha era fatg il deputà dal cussegl grond Bernhard Niggli-Mathis avant circa trais onns. Sin ina dumonda a la regenza pertutgant il finanziar las dimoras en chasas da giuvenils ha el survegnì la resposta che la finanziaziun saja reglada cler en la lescha: La regenza saja però pronta d’examinar quels cas, nua che geniturs vegnan en stretgas finanzialas perquai che la KESB (autoritad per la protecziun da l'uffant e da creschids) haja ordinà mesiras en connex cun la protecziun d’uffants.

Sin dumonda da RTR scriva il departament da giustia, segirtad e sanadad dal Grischun, ch’ina gruppa da lavur saja gist vi dal terminar las lavurs en connex cun la dumonda dal deputà Bernhard Niggli-Mathis. Detagls davart questas examinaziuns intermediaras, na vegnian il mument betg communitgadas.

RR actualitad 06:00