Ambulanza Grischun Central - Fusiun è gartegiada - Novitads

Ambulanza Grischun Central Fusiun è gartegiada

A Tusaun è il mardi vegnida inaugurada ina nov’ambulanza. Ella fa part al servetsch d’ambulanza Grischun Central, cun lieus a Casti, Savognin e Tusaun. Il november da l’onn passà ha il Center da sanadad fusiunà il servetsch d’urgenza cun il spital da Tusaun. Las experientschas fatgas sajan bunas.

Autur: Federico Belotti

Reto Keller il directur dal spital Tusaun (da maun dretg) e Christine Demarmels surpiglian la clav dal nov vehichel ch'è vegnì construì a Volketswil/Turitg.

Tuts sa legran sin la nov'ambulanza che duai tegnair almain diesch onns.

Curdin Camenisch, il schef dal servetsch da salvament Tusaun/Casti/Savognin sa legra sin la nov'ambulanza.

Vista en la nov'ambulanza ch'è vegnida surdada il mardi.

Curdin Camenisch, il schef dal servetsch da salvament ha ditg ch’ins haja fatg fitg bunas experientschas suenter la fusiun. Per exempel ins saja pli flexibel quai che pertutgia ils differents vehichels d’ambulanza, ed era il persunal possia vegnir disponì pli flexibel.

Cunquai che tuttas e tuts radund 20 sanitarias e sanitaris lavurian en tuts trais lieus dal Grischun Central, daventia era la lavur pli interessanta e varianta. A lunga vista possia ins plinavant spargnar custs cun in’organisaziun pli gronda che pli baud, ha ditg Curdin Camenisch.