Actualmain è il project dal sviament da Schmitten pendent tar la confederaziun. La cumissiun per la protecziun da la natira e da la patria da l’Uffizi federal d’ambient fa in’expertisa en chaussa. Il matg da l’onn passà ha la cumissiun visità Schmitten, per sa far in maletg da la situaziun.
Sin dumonda dal Radio Rumantsch conferma la cumissiun federala, che l’expertisa duess esser a fin aifer las proximas emnas.
Expertisa duess sclerir dumondas
Pustà l’expertisa ha la dretgira administrativa dal Grischun. Cura che l’expertisa è avant maun, circa la fin da favrer, vegn la dretgira a decider en chaussa. Il president Urs Meisser quinta da pudair far quai en l’emprima mesadad da quest onn. Il resultat dependia però fitg dal rapport da la cumissiun federala, ha el confermà.
Opposiziun cunter il project
Differentas organisaziuns per l’ambient han fatg recurs cunter la decisiun da la regenza grischuna, ch’ha lubì il 2011 il project per in sviament a Schmitten.
Ils recurrents fan tranter auter valair, ch’il sviament destrueschia ina gronda surfatscha dal funs.