Siglir tar il cuntegn

Grischun Central Andeer avra las portas

Cun il motto «Senza cunfins» sa participescha la Svizra per la 25avla giada als Dis europeics dal monument. La tscherna dad Andeer sco lieu da concurrenza central en il Grischun stat en connex cun il giubileum da 200 onns da l'engrondiment da la via taliana a la via commerziala.

Andeer posseda in maletg dal vitg d'impurtanza naziunala. Il vitg guarda enavos sin ina lunga istorgia da svilup, en la quala mancan per fortuna las grondas catastrofas destructivas sco per exempel ils incendis dal vitg. Singulas chasas èn mantegnidas bain. L'istorgia da lur possessurs e da lur utilisaziun n'è en blers cas anc betg sclerida.

Singuls possessurs da talas chasadas Andeer dattan ils 8 da settember al public interessà invista en las localitads ed en l'istorgia da lur chasas. Ami Conrad, che viva en la Chasa Capoll a l'ur d'Andeer, ha per exempel en sia chasa maletgs da l'artist Hans Ardüser che dateschan dal 1614.

A chaschun dals Dis dal monument mussa il Servetsch archeologic dal Grischun er objects originals chattads en il territori per lung da la via taliana e maina en il cuvel da cult misterius dasper Ziràn.

RR actualitad 17:00