La Canorta Gliendeta ad Andeer porscha tgira per uffants gronds e pitschens. Ils pli pitschens pudessan schon visitar la canorta davent da trais mais enfin ch'els van a scoletta. En la Gliendeta datti dentant er la purschida cumplementara a la scola. Quai vul dir: Ils uffants gronds pon anc star en canorta suenter scola, u sch'i ha da basegn durant las vacanzas u en cas d'urgenza. Cun la Canorta Gliendeta ha l'organisaziun per uffants e giuvenils Pro Junior – che maina differentas canortas en il Grischun – er realisà ina canorta supplementara en la regiun Viamala. Dapi l'avust 2025 curran uffants gronds e pitschens enturn las stanzas da la canorta ad Andeer. E la bilantscha dal emprim onn da la canorta è fitg positiva.
«I ha duvrà preparaziun»
La partenza per l'instituziun è stada schon l'onn passà en l'avrigl. Quatter stanzas da la scola primara veglia ad Andeer èn vegnidas transfurmadas per tgirar ils uffants. Ladina Fausch-Cola, la manadra dal sectur tgira d'uffants tar Pro Junior ha passantà l'avertura da la Canorta Gliendeta uschia: «I ha duvrà preparaziun.» Il zercladur hani tschertgà il persunal. Senza persunal na datti nagina canorta. «Nus avain gì bunas annunzias», raquinta ella. Camilla Marty è la manadra da la canorta e vegn sustegnida dad Esther Grischott, Corina Zeitz, Marion Schneider e Sidonia Clopath. Er actualmain haja Pro Junior danovamain plazzas avertas per la canorta ad Andeer. «Nus tschertgain anc glieud per il nov onn da scola», manegia Ladina Fausch-Cola.
Da nov ina maisa da mezdi
Davent da la stad offrescha la Gliendeta ina nova purschida: La maisa da mezdi. Quella purschida è vegnida giavischada dals geniturs. «Nus essan adina averts per da quellas purschidas, sche nus avain la pussaivladad», ha Ladina Fausch-Cola manegià. Ella sa regorda er ch'i ha dà bleras discussiuns cun l'asil da vegls Glienda pertutgant la marenda. La canorta dastga retschaiver davent dal start la marenda da l'asil. L'avust è stà in mais per s'aclimatisar. Propi entschet ha l'emprema gruppa davent dal settember. «Per ils uffants èsi stà impurtant da s'endisar vid la nova canorta», sa regorda Ladina Fausch-Cola.
Er la manadra da la canorta, Camilla Marty ha manegià: «Jau sun stada surstada da tut las annunzias per las 14 plazzas che stattan a disposiziun. Nus avain propi pudì integrar in uffant suenter l'auter.» Davent da l'entschatta ha la canorta er gia purschì surveglianza dad uffants da scoletta e da las scolaras e scolars dasper l'instrucziun e durant las vacanzas.
Il plan B funcziuna
Quai ch'ha fatg plaschair a Ladina Fausch-Cola è il suandant: «La tgira d'urgenza è stada per l'emprima giada en acziun, e quai ha funcziunà.» La tgira d'urgenza è ina da las purschidas che geniturs n'enconuschan betg bain, u emblidan ch'i dat ella. Ella funcziuna cura che la tgira privata per ils uffants croda ora. Ils geniturs pajan lura ina tariffa da diesch francs per ura. Ladina Fausch-Cola n'ha anc mai vis en ina canorta che quest servetsch funcziuna dalunga uschè bain. I fiss bel, sche quella purschida fiss pli enconuschenta tar ils geniturs. Per els pudess la canorta uschia esser in plan B. «Jau persunalmain chat quai ina flotta purschida, sch'ins dovra propi ella», di ella cun plaschair.
Crescher al mintgadi
L'avertura da la Canorta Gliendeta è er stada cumbinada cun ina u l'autra sfida. La manadra da la canorta Camilla Marty ed er Ladina Fausch-Cola èn stadas omaduas da la medem'opiniun: «L'emprim ina giada han tuts stuì arrivar en il team ed emprender d'enconuscher in l'auter.» Las educaturas s'inscuntran ina giada al mais per sa barattar. Ina da las grondas sfidas è che tuttas lavuran ad Andeer cun in pensum parzial. Quai munta ch'i dovra simplamain pli ditg per sa catar en il team.
Per tschertas collavuraturas è la lavur en canorta insatge tut nov. Betg tuttas han gia lavurà avant en ina canorta. Da stad vegn il process ad entschaiver da nov, cura che nov persunal vegn vitiers cun la maisa da mezdi. Ladina Fausch-Cola vesa er in avantatg cun las plazzas parzialas: «Nus avain tschernì sapientivamain quai. La responsabladad è repartida sin plirs chaus.» Sch'ina da las educaturas croda ora, pon autras remplazzar ella.
Er la manadra da la Canorta Gliendeta, Camilla Marty, lavura en in pensum parzial. Tenor Ladina Fausch-Cola è i segir ina sfida, sche la manadra na è betg preschenta mintga di. La sesida ch'els han mintga main segirescha la cuntinuaziun e la communicaziun malgrà il pitschen pensum. Durant las vacanzas sustegnan er il mainafatschenta, Sandro-Simon Caviezel, e Ladina Fausch-Cola il persunal da la canorta.
Resuns da las famiglias
En general fa la manadra Ladina Fausch-Cola ina bilantscha positiva dal start ad Andeer: «Bain, l'entschatta è propi gartegiada.» La bilantscha positiva per l'emprim onn da la Canorta Gliendeta ha er confermà Camilla Marty. Il resun da las famiglias saja stà fitg bun. Blers hajan ditg ch'els sajan surstads da la grondezza da la canorta e che las localitads sajan cleras ed empernaivlas per ils uffants. Per Ladina Fausch-Cola èn er las differentas vegliadetgnas dals uffants in aspect positiv. Cun quai che tant ils uffants da scoletta sco er las scolaras ed ils scolars vegnian en canorta profiteschian pitschens e gronds in da l'auter. Ils pli gronds hajan plaschair da gidar ils pli pitschens.