Siglir tar il cuntegn

Header

cuntegn

Grischun Central Andeer pudess survegnir baselgia d'autostrada

Ina gruppa d’interess enturn il plevon ed il president communal d’Andeer vul construir ina baselgia sper l’autostrada A13. Anc è il project però a l’entschatta.

Peider Ganzoni il president da la cuminanza d'interess «Baselgia d'autostrada» infurmescha dals plans.
Legenda: Peider Ganzoni infurmescha dals plans. RTR, Federico Belotti

Ad Andeer duai vegnir realisada l’emprima baselgia sper ina autostrada en Svizra Orientala. L’iniziant da la gruppa d’interess è il plevon refurmà Jens Köhre. Peider Ganzoni è il president da la cuminanza d'interess «Baselgia d'autostrada». La baselgia ecumena duai vegnir realisada directamain a l’autostrada. Uschia veglian ins realisar ina purschida che saja en auters pajais gia usit.

En Germania datti 44 baselgias d’autostrada che vegnan tenor statisticas visitadas mintg’onn da bun in milliun visitaders. Mesemna hai dà ina dieta ad Andeer cun differents referents.

Bunas experientschas en Germania

Birgit Krause da la conferenza da baselgias a l’autostrada en Germania ha ditg ch’en Germania hajan ins fatg fitg bunas experientschas cun las baselgias a l’autostrada, ins possia discurrer d’in model da success.

La baselgia refurmada d'Andeer pudess survegnir concurrenza.
Legenda: La baselgia refurmada d'Andeer pudess survegnir concurrenza. RTR, Federico Belotti

La vischnanca d’Andeer avess in lieu adattà tar la sortida sid d’Andeer nua che la baselgia pudess vegnir construida. Proximamain vegl'ins preschentar l’idea ad ina radunanza communala, e guardar tge che la populaziun manegia, ha ditg il president communal Hans Andrea Fontana, che fa part a la cuminanza d’interess «Baselgia d’autostrada A13».

RR actualitad 07:10

Artitgels legids il pli savens