Siglir tar il cuntegn
Inhalt

Grischun Central Andeer sa mussa da sia pli bella vart

Cun il motto «Senza cunfins» è la Svizra sa participada per la 25avla giada als Dis europeics dal monument. La tscherna dad Andeer sco lieu da concurrenza central en il Grischun stat en connex cun il giubileum da 200 onns da l'engrondiment da la via taliana a la via commerziala.

Andeer posseda in maletg dal vitg d'impurtanza naziunala. Il vitg guarda enavos sin ina lunga istorgia da svilup, en la quala mancan per las grondas catastrofas destructivas sco per exempel ils incendis dal vitg. Singulas chasas èn mantegnidas bain. L'istorgia da lur possessurs e da lur utilisaziun n'è en blers cas anc betg sclerida.

Di da las portas avertas en 10 chasas

Singuls possessurs da talas chasadas Andeer han dà la sonda al public interessà invista en las localitads ed en l'istorgia da lur chasas. In dad els è stà Gion Duri Cantieni ch’è creschì si ad Andeer e viva per part ad Andeer. L’interess per sia chasa ch’è passa 500 onns veglia è stà grond. Ordavant tut la tur ha interessà las visitadras ed ils visitaders. Il possessur da la chasa sezs ha ditg envers RTR ch’el haja grond plaschair da mussar sia chasa ch’el haja renovà cun gronda amur per ils detagls.

Servetsch archeologic cun chaussas misteriusas

A chaschun dals Dis dal monument ha il Servetsch archeologic dal Grischun mussà objects originals chattads en il territori per lung da la via taliana ed ha manà en il cuvel da cult misterius dasper Ziràn. Turas hai era dà per ils uffants, quels han pudì visitar lieus cun istorgias curiusas, per exempel in sgrafit cun ia fraja sco motiv. Per exempel han els era visità la chasa Padrun cun ses motivs misterius.

RR actualitad 12:00