Ils 18 da fanadur 2025 ha la Crusch Alva Andeer SA suttascrit il contract da cumpra per l'immobiglia «Crusch Alva». Uschia èn ils acziunaris vegnids infurmads en ina brev. Anc n'appartegna la chasa dentant betg dal tut a la societad – pir cura che l'examinaziun tras la Confederaziun è terminada è la cumpra definitiva. I va tranter auter per examinar sche las reglas da la lescha da Lex Friedrich èn vegnidas resguardadas.
Sinergias èn pussaivlas
Il cussegl d'administraziun ha discutà ils 23 da zercladur 2025 co ch'i va vinavant. Fin la fin da l'onn duai star in plan per la renovaziun, l'ustaria e la finanziaziun. A partir da la primavaira 2026 duai lura vegnir planisà en detagl. Cun il vischin, il center da reabilitaziun Tgea Sulegl, duai vegnir tschertgà il discurs – per guardar sch’i dettia pussaivladads da nizzegiar sinergias.
Reavertura forsa l'onn 2027
In'avertura da la Crusch Alva l’onn 2026 na saja betg realistica, din ils responsabels dal cussegl d’administraziun da la Crusch Alva Andeer SA. La finanziaziun per la renovaziun na saja betg anc garantida. Fin ils 5 da settember saja anc pussaivel da cumprar aczias. A chaschun dal «Koffermarkt» ad Andeer ils 2 d'avust 2025 ha la populaziun gì la pussaivladad da visitar la Crusch Alva e s’infurmar al lieu.
