Sco quai ch’il Parc Beverin scriva en ina communicaziun, saja l’idea da construir ina punt naschida avant otg onns. Tut la laina che deriva da la Val Schons saja vegnida pinada durant l’enviern cun glina plaina. Actualmain è la construcziun da lain sin in areal dasperas la chava da crappa d’Andeer. Venderdi saira a las diesch duai il transport succeder enfin tar il lai da Seara, nua che la punt vegn installada sin ils fundaments ch’èn gia preparads.
Sche tut va tenor plan, alura po la punt gia vegnir nizzegiada la fin d’emna. Grazia questa nova punt daventia la Via Spluga pli attractiva, scriva il Parc Beverin. Da nov na ston las viandantas ed ils viandants betg pli surmuntar ina pendenza da 100 meters d’autezza per ir dad Andeer en direcziun da Sur/Sufers.
