Siglir tar il cuntegn

Header

cuntegn

Grischun Central «Animals da rapina gronds n’han pers nagut en las alps»

Avant 2 onns è vegnida fundada a Poschiavo «L’associaziun per spazis da viver senza animals da rapina gronds». Quai pervi da l’urs M13 ch’è vegnì en Val Poschiavo ed ha fatg tema a la glieud. L’associaziun cun 500 commembers vul vegnir pli activa en autras regiuns e gudagnar novs commembers.

Otmaro Beti, il president da l'associaziun "ATsenzaGP".
Legenda: Otmaro Beti, il president da l'associaziun "ATsenzaGP". RTR, F. Belotti

A la radunanza generala da venderdi saira a Casti en Val d’Alvra ha Otmaro Beti, il president da «L’Associaziun per spazis da viver senza animals da rapina gronds» ditg, che la Svizra saja memia pitschna per animals da rapina gronds: «Animals da rapina gronds n’han pers nagut en las alps», uschia il pur da San Carlo.

Il Cusseglier dals chantuns Stefan Engler che ha tegnì in curt referat a la radunanza generala, ha ditg ch’i saja bun, ch’i dettia in’organisaziun che s’engaschia era per la glieud che ha in problem cun ils animals da rapina gronds: «La vusch da l’associaziun en quest concert politic fa da basegn, uschiglio audian ins mo la vusch da l’autra vart», ha ditg il Cusseglier dals chantuns da la Val d’Alvra. En l’ultima sessiun dal parlament a Berna ha el inoltrà ina moziun che pretenda ina regulaziun dal dumber dals lufs en Svizra. Il parlament ha acceptà la moziun che duai lubir da regular meglier il dumber dals lufs. Oz èsi mo pussibel da sajettar giu lufs, sch’els èn in privel per ils umans, u sch’els han stgarpà in tschert dumber da nursas u fatg gronds donns tar la selvaschina.

Stefan Engler durant ses referat davart ils animals da rapina en Svizra.
Legenda: Stefan Engler durant ses referat davart ils animals da rapina en Svizra. RTR, F. Belotti
audio
Bunura: Radunanza da l'associaziun ch'è cunter animals da rapina
ord Actualitad dals 21.03.2015.
laschar ir. Durada: 3 minutas 26 Secundas.

Artitgels legids il pli savens