«Felsbrocken auf Strasse» – quai è ina da las annunzias inoltradas al nov avisader da qualitad online da la vischnanca Surses. Sin quest portal digital pon abitantas ed abitants sco er giasts annunziar donns e propostas da meglieraziun en il spazi public al vischinadi e quai a partir dals 17 da settember 2025. Il lieu dal donn pon els communitgar automaticamain cun la funcziun da GPS da lur telefonins u manual sin ina charta interactiva. Quella documentescha mintgamai er tut ils avis inoltrads – tant quels gist liquidads sco quels en elavuraziun. Quai è per evitar avis dubels, sco i stat scrit sin la pagina da l'avisader.
Tar il cas «Felsbrocken auf Strasse» dals 25 da settember 2025 ves’ins sin la charta che il cas è marcà verd e damai liquidà – vul dir ch’il servetsch tecnic dal vischinadi ha liberà la via dal crap. Ina fotografia inoltrada ensemen cun l'avis mussa dentant anc las dimensiuns da quel. La pussaivladad d'agiuntar fotografias è dal reminent in'ulteriura funcziun da l'avisader. Da quella è vegnì fatg diever tar radund la mesadad da las annunzias.
Blers avis anc adina per telefon
Cun u senza fotografia – fin ussa è il crap dentant in da be paucs avis, sco Martin Netzer ha confermà envers la FMR: «Questa purschida sa chatta en la fasa iniziala e blera glieud telefonescha anc per communitgar donns.» Probablamain na vulan betg tuts duvrar in formular digital per far quai, suppona il manader dals servetschs tecnics, che administrescha l'avisader da qualitad. Da princip saja quai dentant in bun instrument, di Martin Netzer vinavant. Cunzunt cura ch'i va per donns en lieus, nua ch’ils emploiads dals servetschs tecnics na passan betg mintga di. In tal exempel è – ultra dal crap gia menziunà – l'avis che in'assa d'ina punt da lain sur Salouf saja rutta. Er quest donn è gia liquidà, sco la charta interactiva mussa. «Tar tals cas fa quai senn da duvrar l'avisader da qualitad», ha Martin Netzer ditg, ma: «D'annunziar mintga giada, cura ch'ina sadella da rument publica è plaina, quai n'è betg l'intent da l'avisader e muntass a la finala dapli lavur per nus.» Chaussas sco svidar il rument fetschian ils servetschs tecnics numnadamain tuttina tenor in plan. Respunder respundan els dentant er a talas annunzias. Insumma, i saja previs da respunder a mintga avis.
Ina novaziun en il Grischun
Sche l'avisader da qualitad simplifitgescha la lavur dals servetschs tecnics, quai sto damai anc sa mussar. Quai dependa cunzunt, sche e co che la glieud fa diever da quella nova purschida. Perquai concluda Martin Netzer: «I dovra il saun giudizi.»
Cler è dentant che la vischnanca da Surses fa uschia in proxim pass en la digitalisaziun ed en il Grischun è quai lavur da piunier, sco il manader dal svilup dal lieu da la vischnanca Surses, Stefan Steiner, ha ditg: «Ussa avain nus in tool digital per coordinar tut las annunzias che la populaziun ha inoltrà fin ussa per telefon. Tant sco che jau sai, è Surses ina da las emprimas vischnancas grischunas cun in tal sistem per contribuir a la qualitad da viver.»
Enconuschent saja quai plitost en citads pli grondas da la Bassa sco Rapperswil u Turitg. Quai dentant cun auters nums, vul dir «Stadtmelder» u «Züri wie neu». Annunzias chattan ins dentant er là da quellas pli u main divertentas: «Stuhl auf Trottoir», «Karton auf Strasse» e «Sturzgefahr» èn be 3 da totalmain radund 66 700 annunzias ch'ins chatta sin la pagina da la citad da Turitg. Per cumparegliaziun: suenter quasi in mais mussa l'avisader da la vischnanca da Surses be 14 cas sin la charta interactiva.
- L'avisader da qualitad chatt'ins sin il spurtegl electronic da la vischnanca: www.schalter.surses.ch/qualitaetsmelder-val-surses.