«Savognin ha in problem», resumescha Fredi Gmür. Tranter il 1989 e 1996 era el il directur da turissem da Savognin, il davos onns directur da l'uniun d'albierts per la giuventetgna Svizra. L'expert da turissem observescha anc adina cun interess la situaziun a Savognin. Gia da ses temp sco directur era la relaziun da letgs da hotel cun letg d'abitaziuns da vacanzas en in dischequiliber.
Hotels da famiglia han manchentà d'investir
Per Gmür èsi cler: ils hotels da famiglia han en in sectur da marschas bassas manchentà d'investir ils davos onns. Il medem mument mancan amez vischnanca er las reservas da terren per sa sviluppar ad ina grondezza rentabla. E cumprar ina immobiglia per in pretsch da martgà nua ch'ins stoppia anc investir, na saja per in nov possessur betg interessant. Che Savognin ha in potenzial turistic è Gmür persvas, quai mussia er ch'ina chadaina da hotels avra da stad il hotel UFA.