Cun il cudesch Prosa surmirana Da se cò preschenta la Chasa editura rumantscha in'antologia che preschenta in grond stgazi da la vita e cultura da la Val Alvra e da Surses. Linard Candreia, l'anteriur scolast gimnasial ha ils davos trais onns ramassà e tschernì 73 istorgias e texts curts, raquintads da passa 50 scriventas e scrivents. L'ediziun è vegnida accumpagnada da Renzo Caduff, docent da rumantsch a las universitads da Fribourg e Genevra.
Ina lavur da furmicla
Linard Candreia ha passentà bleras uras en ils archivs e cun selecziunar texts cumparids ina giada en gasettas, revistas e chalenders surmirans. Uschia vegn Candreia tar la conclusiun: «L'intschess surmiran posseda in stgazi litterar propi remartgabel». Cun il cudesch preschentà vegn dada ina invista en la cultura litterara da la Val Alvra e Surses. Cun la lavur da collectar e selecziunar haja el stuì decider da desister per exempel da poesias e cun far il tagl tar publicaziuns enfin il onn 2000 saja anc averta ina porta per litteratura contemporana, uschia Candreia.
Er autras regiuns vulessan
Anita Capaul da la Chasa editura rumantscha è engraziaivla a Linard Candreia per la lavur da furmicla prestada. Er saja ella schon vegnida contactada da persunas da l'Engiadina e Surselva cun la dumonda sch'i vegn er a dar ina tala selecziun per lur regiun. La chasa editura saja fitg averta per tals projects e sch'insatgi sa metta vi da la lavur da collecziunar e selectar vegn ella a sustegnair in tal process.