Ils guauds al nord d'Alvaschagn èn vegnids determinads sco guauds da protecziun. Els protegian il vitg, la via chantunala principala Tusaun – Casti, la via chantunala da colliaziun ad Alvaschagn e la lingia da la Viafier retica cunter lavinas, cunter crudada da crappa, cunter sbuvadas e cunter bovas. Ultra da quai adempleschan quests guauds er ina funcziun impurtanta per l'utilisaziun da laina e per la protecziun da la natira.
Per ch'il guaud possia porscher quests avantatgs er en futur èsi impurtant da tgirar e cultivar ils guauds. La regenza ha approvà in project correspundent:
- Il project cuntegna il schlargiament da la via existenta davent dal center dal vitg d'Alvaschagn fin tar l'emprima platta da volver.
- La cuvrida d'asfalt veglia vegn allontanada e dismessa sco ch'i tutga. La surstructura da la via vegn rinforzada e puspè cuvrida cun asfalt.
- Nua che quai è necessari vegnan construids u renovads stabiliments per allontanar l'aua ed indrizs artifizials.
La via vegn schlargiada a 3,3 meters. En lieus adattads vegnan ultra da quai construidas quatter plazzas per depositar laina respectivamain per installar la crana a cabel.